विराटनगर (हाम्रो खेलकुद)- चर्च ब्वाइज युनाइटेड विराटनगरमा जारी नवौं रमपम विराट गोल्डकपमा सेमिफाइलनमा पुगेको छ ।

विराटनगरको सहिद रंगशालामा शनिवार अन्तिम क्वाटरफाइनलमा एनआरटीलाई २-० ले हराउँदै अन्तिम चार पुगेको हो । चर्च ब्वाइजको लागि रिचर्ड र आकाश राईले गोल गरे।

योसँगै गोल्डकपको सेमिफाइनलको समीकरण पूरा भएको छ । यसअघि विभागीय टोली नेपाल पुलिस क्लब र त्रिभुवन आर्मी एफसी तथा थ्री स्टार क्लब सेमिफाइनलमा पुगिसकेका छन् ।

चर्च ब्वाइजले अब फाइनल प्रवेशको लागि सोमवार पुलिससँग प्रतिस्पर्धा गर्नेछ । खेलको ३५ औं मिनेटमा रिचर्डको‌ गोलमा चर्च ब्वाइजले अग्रता लियो । लाक्पा पाख्रिनको पासमा रिचर्डले चलाखीपूर्ण ढंगले गोल गरेका‌ हुन्।

परिवर्तित आकाशले ६४ औं मिनेटमा टोलीका लागि दोस्रो गोल गरे । आकाश दोस्रो हाफमा चन्दन दासको ठाउँमा मैदान प्रवेश गरेका हुन् ।

एनआरटीको कमजोर रक्षापंक्तिको फाइदा उठाउँदै चर्च ब्वाइज पहिलोे हाफमा १-० अघि लागेको हो । दोस्रो हाफमा एनआरटीले पाएका केही अवसरलाई चर्च ब्वाइजका रक्षापंक्तिका खेलाडीले विफल तुल्याइदिए ।

चर्च ब्वाइजको बलियो रक्षापंक्ति तोड्न नसक्दा एनआरटी पहिलो खेलबाटै घर फर्किन बाध्य भयो।
एनआरटीले पहिलो हाफमा बनाएको केही अवसर गुमाएको थियो ।

खेलको १४ औँ मिनेटमा डिबक्स भित्रबाट एनआरटीका राजिव लोप्चनले गरेको कडा प्रहार चर्च ब्वाइजका गोलकिपर टिकेन्द्र सिंह थापाले रोके ।

२४ औं मिनेटमा एनआरटीका विदेशी खेलाडी अर्मनले गरेको प्रहारमा टिकेन्द्र बाधक बने । ३३ औ मिनेटमा फोदेले वान भर्सेस वानको सुन्दर गोल गर्ने अवसर खेर फाले । उनको प्रहार बार माथिबाट बाहिरियो ।

४० औं मिनेटमा चर्च ब्वाइजका विदेशी खेलाडी आबयोमी डिबक्स भित्रबाट गरेको कडा प्रहार पोसमाथिबाट बाहिरियो । चर्च ब्वाइजका गोलकिपर टिकेन्द्र प्लेयर अफ द म्याच घोषित भए र उनले ११ हजार रुपैयाँ पाए ।

गत महिना २५ औं बुढासुब्बा गोल्डकपको फाइनलमा‌ एनआरटीले चर्च ब्वाइजलाई‌ हराएको थियो।हारेको बदला पनि विराट गोल्डकपमा आएर लिएको छ ।

एनआरटी र चर्च ब्वाइजको जारी यो सिजनको मोफसलमा भएको फुटबल प्रतियोगितामा चौथो पटकको भेट हो । जसमध्ये दुई एनआरटी र दुई चर्च ब्वाइजले जितेको छ । आइतबार पहिलो सेमिफाइनल आर्मी र थ्री‌ स्टार बिच हुनेछ ।