दिपक न्यौपाने (बुटबल) – सिएमजी क्लब संकटाले लगातार दोस्रो हप्ता पनि नेपाल एपिएफ क्लबलाई हराएको छ । थप समयमा बालो मउसाको निर्णायक गोलमा सोमबार एपिएफलाई २–१ ले हराउँदै संकटा १९ औं तिलोत्तमा गोल्डकप फुटबल प्रतियोगिता सेमिफाइनलमा पुगेको छ ।

अघिल्लो सोमबार पनि १९ औं बुढासुब्बा रेडबुल गोल्ड कप फुटबल प्रतियोगिताको क्वार्टरफाइनलमा संकटाले एपिएफलाई १–० ले हराएको थियो । देविनगरस्थित एन्फा टेक्निकल सेन्टरमा थप समयको १५ औं मिनेटमा मउसाले निर्णायक गोल गरेक थिए । सजिन थापाको पासमा मोउसाले गोल गरेका हुन् । १–१ को बराबरीपछि २० मिनेटमा समय थप गरिएको थियो । त्यसअघि आजयी मार्टिन्सको गोलमा संकटाले लिएको अग्रता जोगाउन सकेन । ४९ औं मिनेटमा उनले हेडमार्फत गोल गरेका थिए । ६९ औं मिनेटमा एपिएफका रवि थिङले गोल गर्दै खेललाई १–१ को बराबरी गरेका थिए ।

रविले नवीन लामाको पासमा हेड गोल गरेका थिए । संकटाका मउसा खेलको म्यान अफ दी म्याच घोषित भए । पुसमा पूर्वाञ्चलमा भएको सातौं राष्ट्रिय खेलकुदको फुटबलमा स्वर्ण पदक जितेयता एपिएफले लगातार आठ खेल हारेको थियो । सबै खेलमा टोली पहिलो खेलबाट पराजित भएको थियो । बुटवल आइपुगेर भने एपिएफको हारको सिलसिला टुंगिएको थियो । एपिएफले भारत कालिङपोङको सेरे एफसीलाई १–० ले हराउँदै अघि बढेको थियो । तर, फेरी सोमबारको खेलमा पराजित हुँदै टोली तिलोत्तमा गोल्ड कपबाट बाहिरिएको छ । संकटाले अब हिमालन शेर्पा क्लबसँग सेमिफाइनल खेल्नेछ ।

आयोजक अग्नी रुपन्देही ११ र हिमालयन शेर्पा क्लब यसअघि नै तिलोत्तमा गोल्ड कपको सेमिफाइनल पुगिसकेका छन् । रुपन्देही जिल्ला फुटबल संघको आयोजनामा सञ्चालित मोफसलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्र्यो । गत बर्ष भने प्रतियोगिताले पुनः निरन्तरता पाएको छ । यसपटक प्रतियोगितालाई अग्नी सिमेन्टले मुख्य प्रायोजन गरेको छ । बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् । त्यस्तै एन्फा, राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।

फोटो – मनोज थापा