काठमाडौँ (हाम्रो खेलकुद) – शेख कमल अन्तराष्ट्रिय क्लब कप २०१७मा सहभागिता जनाएर मंगलबार स्वोदेश फर्केको मनाङ मर्स्याङदी क्लबका खेलाडीहरु बिहिबारबाट राष्ट्रिय टोलीको प्रशिक्षणमा सहभागी हुने भएका छन्।
एएफसी एसियन कप २०१९ – छनोट चरण अन्तर्गतको पहिलो खेलमा फिलिपिन्सविरूद्धको खेलको तयारीको लागि विगत २ सातायता नेपाली टोली सातदोबाटोस्थित एन्फा कम्प्लेक्सको मैदानमा प्रशिक्षणरत छ। बंगलादेशमा भएको अन्तराष्ट्रिय मान्यता प्राप्त प्रतियोगिता भएकाले मनाङका खेलाडीलाई भने एन्फाले फुकुवा गरेको थियो।
जापानी प्रशिक्षक ग्योतोकु कोजीले मनाङका १० खेलाडीलाई प्रारम्भिक छनोटमा बोलाएका छन्। डिफेन्डर कमल श्रेष्ठ, बिराज महर्जन, देवेन्द्र तामाङ र बिमल बस्नेतसंगै मिडफिल्डर बिशाल राई, हेमन्त थापा मगर, बिक्रम लामा र सुजल श्रेष्ठ प्रारम्भिक छनोटमा परेका थिए। राष्ट्रिय टोलीका कप्तान अनिल गुरुङ र १ वर्षको चोटपछि मैदान फर्केका रोहित चन्दपनि प्रशिक्षणमा सहभागी हुनेछन्।
नेपालले एएफसी एसियन कप २०१९ – छनोट चरण अन्तर्गतको पहिलो खेल फिलिपिन्सको मनिलामा रहेको रिजाल मेमोरियल रंगशालामा खेल्दैछ। खेल चैत्र १५ गते नेपाली समयानुसार साँझ ५:४५ बजे हुनेछ।
