एजेन्सी – स्पेनिश ला लिगा अन्तर्गत बुधबार राति भएको खेलमा रियल म्याड्रिडले लास पाल्माससंग ३-३को बराबरी खेलेको छ।
खेलको ८५औं मिनेटसम्म ३-१ले पछि परेको १० खेलाडीमा सिमित म्याड्रिड, रोनाल्डोले ३ मिनेटमा २ गोल गरेपछि खेल बराबर गर्न सफल भएको थियो। खेलको ८औं मिनेटमा इस्कोको गोलको मद्दतले म्याड्रिडले अग्रता लिएको थियो। तर त्यसको दुई मिनेट नबित्दै पाल्मासका टानाले बराबरी गोल फर्काए।
दोश्रो हाफको सुरुवातमा ग्यारेथ बेललाई विपक्षी खेलाडीसंग हातपात गरेको भन्दै रेफ्रीले रातो कार्ड दिएपछि रियल म्याड्रिड १० खेलाडीमा सिमित भएको थियो। पाल्मासले म्याड्रिडको कमजोरीको पुर्ण फाइदा उठाउँदै ५६औं मिनेटमा जोनाथान भिएरा र ५९औं मिनेटमा केभिन प्रिन्स बोटेङको गोलले ३-१को अग्रता बनायो।
खेलको ८६औं मिनेटमा रियल म्याड्रिडले पेनाल्टि पायो र रोनाल्डोले सजिलै गोल गर्दै खेलमा म्याड्रिड फर्कने संकेत दिए। त्यसको दुई मिनेट पछिनै हामेस रोड्रिग्वेजको पासलाई सदुपयोग गर्दै रोनाल्डोले म्याड्रिडलाई बराबरीमा ल्याए।
यस बराबरीसंगै रियलको शिर्ष स्थानबाट झरेर दोश्रो स्थानमा पुगेको छ। २५ खेलमा ५७ अंक जोडेको बार्सीलोना शिर्ष स्थानमा छ भने २४खेल खेलेको म्याड्रिडको ५६ अंक रहेको छ।
