काठमाडौं (हाम्रो खेलकुद)- अखिल नेपाल फुटबल संघ (एन्फा) ले महिला राष्ट्रिय फुटबल टोलीको प्रशिक्षक
घोषणा केहि दिनमै गर्ने तयारी गरेको छ।

एएफसी प्रो लाइसेन्स प्रशिक्षकलाई माहिला टोलीको जिम्मेवारी दिने भनेर एन्फाले आवेदन खुल्ला गरेको थियो।

२१ प्रशिक्षकले आवेदन दिएको बुझिएको छ। जसमध्ये दुई प्रशिक्षक अन्तिम छनोटमा परेका छन्। ती दुई मध्ये एकको नाम सार्वजनिक गर्ने तयारीमा एन्फा रहेको छ।

विदेशी प्रशिक्षकलाई प्रमुख प्रशिक्षकको जिम्मेवारी दिएपछि अहिले राष्ट्रिय टिम सम्हालिरहेका राजेन्द्र तामाङलाई एन्फाले सहायक प्रशिक्षकको जिम्मेवारी दिने भएको छ।

महिला राष्ट्रिय टिमको बिदाइ समारोहमा तामाङले महिला टिमको लागि एएफसी प्रो लाइसेन्स प्रशिक्षकको‌ साथ रहनु नेपाली टोलीको लागि सकारात्मक रहेको बताए।

उनै प्रो लाइसेन्स प्रशिक्षकसँग काम गर्न पाउनु आफ्नो लागि अवसर हुने बताए। ‘केहि सिक्न पाइन्छ। यसलाई मैले अवसरको रूपमा लिएको छु,’ उनले भने।‌

एन्फा महासचिव किरण राईले हाम्रो खेलकुद डटकमलाई प्रशिक्षक तामाङलाई सहायक प्रशिक्षकमा नियुक्त गरिएको बताए।

प्रशिक्षक तामाङको प्रशिक्षणमा नेपाल वाफ, साफ र फोर नेशन्सको फाइनलमा पुगेको थियो। प्रमुख प्रशिक्षकको रुपमा तामाङ उनको लागि थाइल्याण्ड भ्रमण अन्तिम हुनेछ।