एजेन्सी – पहिलो पटक च्याम्पियन्स लिग जितेको पेरिस सेन्ट-जर्मेन (पिएसजी) का खेलाडीले आइतवार दिउँसो पेरिसमा विजय उत्सव मनाए ।

तर त्यसको केही घण्टा अघि फ्रान्सभरि अशान्ति फैलिएको थियो । लिग वान टोली पिएसजीले शनिवार म्युनिखमा भएको फाइनलमा इन्टर मिलानलाई ५-० ले पराजित गर्दै आफ्नो च्याम्पियन्स लिग उपाधि जितेको थियो।

लुइस एनरिकेको टोलीले चाम्प्स-एलिसिसदेखि आर्क दे ट्रायोम्फसम्म खुला बसमा विजयी परेड गरेको थियो।
उत्सवको क्रममा सुरक्षाको व्यवस्था कडा गरिएको थियो । शनिवार राति खेलपछि देशभरि व्यापक अव्यवस्था हुँदा २ जनाको ज्यान गएको थियो।

दक्षिण-पश्चिमी शहर डाक्समा १७ वर्षीय युवाको छातीमा छुरा प्रहारबाट मृत्युको भएको थियो। पेरिसको मध्य भागमा स्कुटर चढिरहेका २३ वर्षीय अर्का युवाको सवारी साधनको ठक्करबाट दिँदा मृत्यु भएको थियो।

पेरिस प्रहरी प्रमुख लरेन्ट नुनेजका अनुसार रातभर भएको झडपमा १ सय ९२ जना घाइते भएका थिए। पेरिसमा मात्र ४ सय ९१ जनालाई पक्राउ गरिएको थियो।

पेरिसलगायतका क्षेत्रमा पटका, आतसबाजी, बस स्टप तोडफोड, गाडी जलाउनेजस्ता घटनाहरू भएका थिए।
२२ जना प्रहरी र ७ जना दमकलकर्मी घाइते भएका थिए । २ सय ६४ वटा गाडीहरूमा आगजनी गरिएको थियो।

फ्रान्सको दक्षिण-पूर्वी शहर ग्रेनोब्लमा पिएसजीका समर्थकलाई गाडीले ठक्कर दिँदा ४ जना घाइते भएका थिए । प्रहरीका अनुसार घाइते एउटै परिवारका सदस्य थिए र तीमध्ये २ जनाको अवस्था गम्भीर थियो।

पिएसजीले विज्ञप्ति जारी गर्दै उत्सवका क्रममा देखिएका हिंसात्मक गतिविधिकि भर्त्सना गरेको छ।
‘ समर्थकहरुको अनुशासित व्यवहार सिजनभर सराहनीय रह्यो। तर यस्ता छुट्टाछुट्टै हिंसात्मक क्रियाकलापहरू क्लबको मूल्य तथा विचारधारासँग मेल खाँदैनन् र यी घटनाहरूले हाम्रो विशाल समर्थन समूहको प्रतिनिधित्व गर्दैनन्,’ क्लबले भनेको छ।

अशान्तिपछि पनि आइतवार परेड गर्ने निर्णय भएको थियो। कार्यक्रममा अधिकतम १ लाख सहभागीहरूको सिमा तोकिएको थियो।

परेडपछि पिएसजीका खेलाडी फ्रान्सका राष्ट्रपति इम्यानुएल म्याक्रोँसँग भेट गर्न एलिसी दरबार पुगेका थिए।