काठमाडौं (हाम्रो खेलकुद) – हङकङसँग अन्तराष्ट्रिय मैत्रिपूर्ण खेल खेल्न जाने नेपाली राष्ट्रिय पुरूष फुटबल टिमलाई अखिल नेपाल फुटबल संघ (एन्फा) ले भिसा नआएपनि बिदाइ गरेको छ ।

एएफसी एसियन कप छनोट अन्तर्गत लाओससँग हुने खेलको तयारीका लागि टिम मंगलबार हङकङ जाने कार्यक्रम छ । तर सोमबारसम्म भिसा नआएपनि एन्फाले टोलीको बिदाइ भने औपचारिक कार्यक्रममै गरेको छ ।

सोमबार विहान मात्र अखिल नेपाल फुटबल संघ (एन्फा) ले २३ सदस्यीय नेपाली राष्ट्रिय फुटबल टिमको घोषणा गरेको थियो । नेपालले यही विहिबार हङकङसँग मैत्रिपुर्ण खेल खेल्ने तालिका रहेको छ ।

युवा तथा खेलकुद मन्त्री तेजुलाल चौधरीले नेपाली टिमलाई शुभकामना सहित बिदाई गरिसकेका छन्। नेपाली टिम भोलि हङकङ‌ उड्ने भनिएको छ । तर नेपाली टिमको भीसा लागेको छैन ।

स्रोतका अनुसार एन्फाबाट ३८ जनाको भिसा प्रक्रियामा पठाइएको थियो । जहाँ २३ खेलाडी तथा १५ पदाधिकारी कसैको पनि भिसा आएको छैन । एन्फाबाट जम्बो टोलीको भिसा आवेदन भएकोले ढिलाई भएको हुन सक्ने अनुमान गरिएको छ । सामान्यतया फुटबलमा २३ खेलाडी र ८ अफिसियलको टोलीलाई अधिकारिक टोली मानिन्छ । तर एन्फामा भने प्रायजसो अतिरिक्त पदाधिकारी पठाउने चलन रहँदै आएको छ ।

लाओससँग नेपालले जुन १० मा खेल खेल्नेछ । यसअघि छनोटमा नेपाल मलेसियासँग २-० ले पराजित भएको थियो ।

नेपाली राष्ट्रिय फुटबल टोली:

किरण चेम्जोङ (कप्तान ), अभिषेक लिम्बु, अनन्त तामाङ, अञ्जन विष्ट, आरिक विष्ट, आयुष घलान, बिमल पाण्डे, विशाल सुनार, दीप कार्की , गिलेस्पी जङ्ग कार्की, कृतिश रत्न छुन्जु, कुशल देवुवा, लाकेन लिम्बु, मणि कुमार लामा, मनिष डाँगी, रोहित चन्द, रोहन कार्की, सनिश श्रेष्ठ, श्रृजन राज गौतम, सुमन श्रेष्ठ, सुमित श्रेष्ठ, सुवास ठकुरी बम र योगेश गुरुङ।