काठमाडौं (हाम्रो खेलकुद) – विभागीय टोली एपिएफ फुटबल क्लबले आफूले गरेको उजुरीको अखिल नेपाल फुटबल संघ (एन्फा) ले समयमा सुनुवाई नगरेको भन्दै असन्तुष्टि पोखेको छ ।

सहिद स्मारक ए डिभिजन लिग २०७९ को अन्तिम खेलमा थ्री स्टार क्लबले जावलाखेल युथ क्लबविरुद्ध दुई विदेशी खेलाडी पिटर सेगुन र अजायी मार्टिन्सले भिसा नभएको अवस्थामा खेल खेलेको भन्दै उजुरी दिएको थियो । थ्री स्टारले अन्तिम खेलमा जावलाखेललाई १-० ले हराएपछि एपिएफ रेलिगेसनमा परेको थियो ।

२०८० जेठ २८ गते भएको त्यो खेलको भोलिपल्ट नै एपिएफले दिएको उजुरीको आधारमा एन्फाको अनुशासन समितिले थ्री स्टारलाई २०८० पुषमा कारवाही पनि गरेको थियो ।

अनुशासन समितिले विदेशी खेलाडीद्वय पिटर र मार्टिन्सलाई जनही ५० हजार तथा थ्री स्टार क्लबलाई ३ लाख रुपैयाँ जरिवाना गरेको थियो । तर एपिएफ र थ्री स्टार दुवैले टोली कारवाही मान्य नरहेको र निर्णय नै त्रुटीपूर्ण रहेको दाबी गरेका थिए ।

एपिएफका अनुसार उक्त निर्णयले फिफाले नै बनाएको अनुशासन नियमावली पालना नगरेको दाबी रहेको छ । कुनैपनि खेलमा टोलीले अयोग्य खेलाडी खेलाउँदा उक्त खेलको नतिजा विपक्षी टोलीको जित र त्यससँगै जरिवाना हुनुपर्ने माग एपिएफको छ ।

यता थ्री स्टारले भने एन्फाले लिग तोकिएको समयमा सम्पन्न गर्न नसक्दा भिसा प्रक्रियामा ढिलाई भएको बताएको थियो । क्लबले अनुशासन समितिको निर्णयमा असन्तुष्टि जनाउँदै, ‘भिसा प्रक्रिया चलाएकामा प्रकृयागत ढिलाइ भएको हुँदा खेलाडी तथा क्लबलाई जरिवाना गराउने गरी भएको अनुशासन समितिको निर्णय फुटबल खेलको भावना र मर्म विपरीत भएको निर्णय त्रुटिपूर्ण छ ’ भनेर एन्फालाई पत्राचार पनि गरेको थियो ।

तर एपिएफले भने अध्यागमनबाट सम्पूर्ण प्रमाण र विश्व फुटबलमा यस्ता घटनामा भएका निर्णयहरुलाई नजिर राख्दै अपिल समितिले निर्णय गम्भीरतापूर्वक लिनुपर्ने माग राख्दै आएको छ ।

एपिएफले नेपालमा बस्ने र काम गर्ने कागजको म्याद नै सकिएको अवस्थामा खेलाडीको दर्ता नै वैध नहुने र खेलाडी अयोग्य रहने दाबीका साथ त्यो खेलको नतिजा उल्टाउन माग गरेको हो ।

एन्फाको अपिल समितिमा अझैपनि यो विषय विचाराधीन रहँदा एन्फाले एपिएफलाई यू-१६ लिगमा सहभागी नगराउने निर्णय लिएपछि क्लबले असन्तुष्टि व्यक्त गरेको हो । एपिएफका व्यवस्थापक समेत रहेका सशस्त्र प्रहरी निरीक्षक विजय केसीले एन्फाको विलम्बले क्लबलाई निकै समस्यामा पारेको बताए ।

‘हामी निर्णयको पर्खाइमा छौं । अपिल समितिले प्रष्ट रुपमा यो निर्णय हो भनेर भन्न सकिरहेको छैन । अनुशासन समितिको निर्णय त्रुटिपूर्ण भएर नै अपिल समितिमा गएका हौं । डेढ वर्ष बढी समय बित्दा पनि निर्णय आएको छैन । निर्णय लिन कठिन छ, तर विलम्ब गर्दा हाम्रो योजनामा नै प्रभाव परिरहेको छ,’ केसीले भने ।

केसीले थ्री स्टारले अयोग्य खेलाडी खेलाएको प्रष्ट रहेको र यस्तो अवस्थामा अन्य फुटबल लिगमा गरिने निर्णयको नजिर हेर्नुपर्ने पनि बताए । ‘हामीले फिफाको विश्वकप छनोट र क्लब फुटबलमा पनि अयोग्य खेलाडी खेलाउँदा टिमले हार बेहोरेको उदाहरण देखेका छौं । सन् २०१५ मा रियल म्याड्रिड पनि अयोग्य खेलाडी खेलाउँदा कोपा डेल रेबाट नै बाहिरिएको थियो । एन्फाले पनि आफ्नो र फिफाको नियम अनुसार निर्णय लिन्छ भन्ने विश्वास छ,’ उनले भने ।

एन्फाको अपिल समितिमा अन्य धेरै विषय निर्णयको प्रतिक्षामा रहेको बुझिएको छ । यसै महिना अपिल समितिले बि डिभिजन क्लब सरस्वती युवा क्लबका फरवार्ड धिरेन्द्र शाहको विषयमा भने निर्णय गरेको थियो । एन्फाको साधारण सभामा पनि उठेको उक्त विषयमा भने फिफाले नै एन्फालाई निर्देशन दिएपछि अपिल समितिले तुरुन्त निर्णय दिएको बुझिएको छ ।

एपिएफ र थ्री स्टारको विषयमा भने अपिल समितिले हालसम्म निर्णय गर्न सकेको छैन । यो विलम्बले क्लबलाई निकै असर परिरहेको र चाडो भन्दा चाडो निर्णयको अपेक्षा राखेको क्लबले जनाएको छ ।