एजेन्सी – फिफा विश्वकप २०२६ का लागि एसिया क्षेत्रबाट उज्वेकिस्तान र जोर्डन छनोट भएका छन् । दुवै राष्ट्र पहिलो पटक विश्वकपमा छनोट भएका हुन् ।

शुक्रबार भएको छनोट खेलमा निकटतम प्रतिद्वन्द्वी यूएईलाई उसकै मैदानमा गोलरहित बराबरीमा रोक्दै उज्वेकिस्तानले समूहको शीर्ष २ मा स्थान पक्का गरेर विश्वकपमा स्थान बनाएको हो । लिग चरणको १ खेल बाँकी रहँदा उज्वेकिस्तान ४ अंकले अघि रहेपछि यूएईले भने अब अर्को चरणमा प्रतिस्पर्धा गर्नुपर्ने भएको छ ।

तेस्रो चरणमा सहभागी १८ टोलीलाई ३ समूहमा विभाजन गरिएको छ । जहाँ हरेक समूहका शीर्ष २ टोली सिधै विश्वकपमा पुग्दा तेस्रो र चौथो चरणको टोलीले अर्को छनोट खेल्नेछन् । समूह ए मा उज्वेकिस्तान र इरानले शीर्ष २ मा रहेर विश्वकपमा स्थान पक्का गरेका हुन् । यस समूहबाट कतार र यूएईले अर्को चरण खेल्नेछन् । लिगको एक खेल बाँकी रहँदा इरानको २०, उज्वेकिस्तानको १८, यूएईको १४, कतारको १३, किर्गिस्तानको ७ र जितविहिन उत्तर कोरियाको ३ अंक छ ।

त्यस्तै समूह बी बाट दक्षिण कोरियासँगै जोर्डनले पनि विश्वकपमा स्थान बनाएको छ । जोर्डनले आफ्नो खेलमा ओमानलाई ३-० ले पराजित गर्नुका साथै दक्षिण कोरियाले इराकलाई २-० ले हराएपछि जोर्डनको पनि विश्वकपमा स्थान पक्का भएको हो । दक्षिण कोरिया १९ अंक र जोर्डन १६ अंक जोडेर शीर्ष २ मा पक्का भएका छन् । १२ अंक जोडेको इराकले अर्को चरण खेल्दा १९ अंक जोडेको ओमान र ९ अंक जोडेको प्यालेस्टाइनबीच चौथो स्थानका लागि प्रतिस्पर्धा छ । कुनै जित निकाल्न नसकेको कुवेत ५ अंक जोड्दै बाहिरिसकेको छ ।

समूह सी बाट जापान २० अंकका साथ विश्वकपमा छनोट भएको छ । १६ अंक जोडेको अष्ट्रेलिया र १३ अंक जोडेको साउदी अरेबियाबीच अर्को साता हुने खेलले दोस्रो टोलीको टुंगो लगाउनेछ । इन्डोनेसिया १२ अंक साथ चौथो रहेर अर्को चरणमा पुगेको छ । बहराइन र चीन ६-६ अंक जोड्दै बाहिरिएका छन् ।

हालसम्म एसियाबाहेक मेक्सिको, क्यानडा, अमेरिका, अर्जेन्टिना, इरान, जापान र न्युजिल्याण्डले पनि विश्वकपमा स्थान पक्का गरेका छन् ।