भरतपुर (हाम्रो खेलकुद)- चौथो पेन्गुईन भरतपुर २४ गोल्डकप फुटबल प्रतियोगिता आज सुरु हुँदैछ।

आयोजक भरतपुर २४ गोल्डकप उपभोक्ता समितिका अध्यक्ष रमेश पुरीका अनुसार जेठ ३१ गतेसम्म चल्ने प्रतियोगितामा ८ टोली सहभागी छन् ।

प्रतियोगिताको उद्घाटन खेलमा भरतपुर २४ खेलकुद विकास समिति र हानामी भरतपुर फुटबल क्लब बिएफसी भिड्नेछन् ।
प्रतियोगितामा भरतपुर २४ र बिएफसीसँगै प्याराडाइज युवा क्लब सिसुवार र रामपुर फुटबल क्लब समूह ए मा रहेका छन् । यस्तै अर्को समूहमा स्टार स्पोर्टस क्लब माडी, जनशक्ति युवा क्लब नवलपरासी, सूर्यपुर फुटबल क्लब र मकवानपुर ११ रहेका छन् ।

प्रतियोगिताको विजेताले ट्रफीसहित ३ लाख ३ हजार तथा उपविजेताले एक लाख ७५ हजार प्राप्त गर्नेछन् । प्लेयर अफ दि म्याचले तीन तथा विधागत उत्कृष्ट खेलाडीले जनही ७ हजार ५ सय प्राप्त गर्नेछन् । पेन्गुईन एजुकेसन कन्सल्टेन्सी प्रतियोगिताको मुख्य प्रायोजक रहेको छ ।

भरतपुर २४ का वडाध्यक्ष राम गोदार प्रतियोगिताका लागि वडा कार्यालयले चालु आर्थिक वर्षमा बजेट नै विनियोजन गरेको बताए ।

वडाले खेल क्षेत्रको बिकासका लागि यस किसिमका प्रतियोगिताका साथै खेलाडीहरुलाई तालिम दिईरहेको बताए । ग्रास रुट फुटबल बिकासका लागि पनि वडाले विभिन्न कार्यक्रम गरिरहेको उनको भनाइ थियो ।