काठमाडौं (हाम्रो खेलकुद)- अन्तर्राष्ट्रिय फुटबलमा नेपाल पहिलो पटक लाओससँग पराजित भएको छ। एएफसी एसियन कप छनोटमा नेपाल आज घरेलु टोली लाओससँग २-१ गोल अन्तरले पराजित भएको छ।

छनोट चरणमा नेपाललले लगातार दोस्रो हार बेहोरेको छ।‌ लाओसको नेशनल स्टेडियममा नेपाल विरूद्ध लाओसले १३औं मिनेटमा नै अग्रता बनायो। प्राप्त कर्नरमा अनाउसोने छापान्याको हेडरले सही दिशा लियो। लाओसले १-० को अग्रता बनायो।

नेपाल पहिलो हाफमा खेलमा फर्कन सकेन। पहिलो हाफमा लाओसले १-० को अग्रता बनायो। दोस्रो हाफ सुरु भएको चौथो मिनेटमा नेपाललाई अर्को झट्का लाग्यो। पिटर फान्थाभोङ्गले लाओसको अग्रता दुगुना गरे।

२-० पछि परेको नेपालका मनिष डाँगीलाई लाओसका खेलाडीले बक्सभित्र फाउल हाने। रेफ्रीले नेपाललाई पेनाल्टीको अवसर दिए। खेलको ७१ औं मिनेटमा पेनाल्टीमा मनिषले गोल गरे। नेपालले गोल अन्तर घटायो। थप गोल गर्न नसक्दा नेपाल लाओससँग हार बेहोर्न बाध्य भयो।

यसअघि नेपाल पहिलो खेलमा मलेसियासँग २-० ले हारेको थियो। दुई खेलको समाप्तिमा नेपालले अंकको खाता खोल्न सकेको छैन।

नेपाल र लाओसबीचको यो सातौं भिडन्त हो। जहाँ लाओस पहिलो पटक नेपाललाई हराउन सफल रहयो। यसअघि नेपालले ३ खेलाम लाओसलाई हराउँदा ३ खेल बराबरीमा सकिएको थियो।

लाओससँग खेल्नु अगाडि नेपालले तयारीको लागि तुलनात्मक रूपमा बलियो प्रतिद्वन्द्वी हङ्कङसँगै अन्तराष्ट्रिय मैत्रिपूर्ण खेलमा गोल रहित बराबरी खेलेको थियो।

प्रशिक्षक म्याट रसको प्रशिक्षणमा चौथो खेल हो। सिंगापुर विरूद्ध नेपालले जित निकाल्दा मलेसियासँग २-० को हार बेहोरेको थियो। हङकङसँग भने बराबरी नतिजा आएको थियो।

नेपाल सम्मिलित समुहमा लाओस, मलेसिया र भियतनाम रहेका छन्। वरीयताका आधारमा भियतनाम र मलेसिया नेपाल भन्दा बलियो प्रतिद्वन्द्वी हुन्।

समूहमा रहेका प्रत्येक टोलीले होम एण्ड अवेको आधारमा कुल ६ खेल खेल्नेछन्। यसपछि समूह विजेताले २०२७ मा साउदी अरेबियामा हुने १९ औं एसियन कपमा स्थान बनाउनेछ।