सुशील पन्त क्षेत्री,भरतपुर

सूर्यपुर एफसी चौथो पेन्गुईन भरतपुर २४ गोल्डकप फुटबल प्रतियोगिताको को सेमिफाइनलमा प्रवेश गरेको छ ।

पहिलो चरणको अन्तिम खेलमा आज मकवानपुर ११ लाई २-० ले हराउँदै सूर्यपुरले सेमिफाइलमा स्थान बनाएको हो ।

सिद्धार्थ माविको मैदानमा भएको खेलमा सूर्यपुरलाई जिताउन पासाङ लामा र राम थापाले गोल गरे । खेलको पहिलो हाफ गोलरहित बराबरीमा सकिएको थियो ।

दोस्रो हाफको पहिलो मिनेटमा नै लक्षु थापाको सेटअपमा पासाङले गोल गर्दै सूर्यपुरलाई अग्रता दिलाए । खेलको अन्तिम मिनेटमा रामले गोल गर्दै सूर्यपुरको जित निश्चित गरे । उनले चन्दन दासको सेटअपमा सुन्दर गोल गरेका हुन् । सूर्यपुरका पासाङ प्लेयर अफ दि म्याच भए ।

सूर्यपुरले जेठ २९ गते दोस्रो सेमिफाइनलमा जनशक्ति युवा क्लब नवलपरासीको सामना गर्नेछ । जनशक्ति यस अघि नै साविक विजेता स्टार स्पोर्टस क्लब माडीलाई हराउँदै अन्तिम चारमा पुगेको थियो ।

हानामी भरतपुर फुटबल क्लब बिएफसी र प्याराडाइज युथ क्लब रत्ननगरबीच बुधवार हुने पहिलो सेमिफाइनलमा दिउँसो ४ बजे सुरु हुनेछ ।

बिएफसी भरतपुर २४ खेलकुद विकास समिति तथा प्याराडाइज रामपुर एफसीलाई हराउँदै सेमिफाइनल पुगेका हुन् ।

प्रतियोगिताको फाइनल शनिवार हुनेछ । भरतपुर – २४ गोल्डकप उपभोक्ता समितिको आयोजनामा जारी प्रतियोगितामा ८ टोली सहभागी छन् ।

प्रतियोगिताको विजेताले ट्रफीसहित ३ लाख ३ हजार तथा दोस्रो टोलीले १ लाख ७५ हजार प्राप्त गर्नेछ ।