काठमाडौं (हाम्रो खेलकुद) – अखिल नेपाल फुटबल संघ (एन्फा) ले पूर्व कार्यवाहक अध्यक्ष तथा थ्री स्टार क्लबका पूर्व अध्यक्ष ललितकृष्ण श्रेष्ठको १०औं स्मृति दिवसमा एन्फा परिसरमा श्रद्धाञ्जली सभा आयोजना गर्यो ।

एन्फाको मुख्यालयमा रहेको स्वर्गीय श्रेष्ठको अर्धकदको शालिकमा श्रेष्ठका परिवारसँगै एन्फा पदाधिकारी, कर्मचारी, रेफ्री, प्रशिक्षक, खेलाडी, पत्रकार लगायत यू२० महिला टोलीका खेलाडीले माल्यार्पण गरेका थिए ।

एन्फाकै सभाहलमा आयोजित स्मृति सभामा विभिन्न व्यक्तित्वले श्रेष्ठलाई श्रद्धाञ्जली अर्पण गर्दै उनीसँगको स्मरण साटेका थिए ।

थ्री स्टार क्लबका महासचिव धर्मेन्द्र शाक्यले श्रेष्ठले खेलाडी हुँदा क्लबलाई डी डिभिजनबाट ए डिभिजनसम्म यात्रा गर्दा खेलाडी मात्र नभएर व्यवस्थापनमा पनि उत्तिकै व्यस्त रहने गरेको स्मरण गरे ।

श्रेष्ठले त्यसबेलादेखि नै युवाहरु समेटेर अघि बढ्नुपर्छ भन्ने धारणा राख्दै नेतृत्वको क्षमता देखाएको उनले बताए । क्लबले यहाँसम्म व्यावसायिक यात्रा तय गर्नु र फ्यान संस्कृति अघि बढाउनुमा श्रेष्ठकै देन रहेको शाक्यले चर्चा गरे ।

थ्री स्टारका पूर्व कप्तान तथा नेपाल फुबल खेलाडी संघका अध्यक्ष विक्रम लामाले आफ्नो समयका हरेक खेलाडीसँग श्रेष्ठको अन्योंयाश्रित सम्बन्ध रहेको सम्झना गरे ।

लामाले आफ्नो फुटबल करिअरले उचाई लिनुमा स्वर्गीय श्रेष्ठको ठूलो देन रहेको बताउँदै वहाँले देखेको सपना प्राप्त गर्नु नै नेपाली फुटबलले दिने असली सम्मान हुने बताए ।

एन्फा अध्यक्ष पंकज नेम्वाङले स्वर्गीय श्रेष्ठले आफ्नो कार्यकालमा गरेको काम र व्यवहारले नै आजसम्म पनि सबैको माझ उत्तिकै प्रिय रहेको अनुभव साटे । उनले नेपाली फुटबलप्रति इमान्दार रहेर काम गरेमात्र स्वर्गीय श्रेष्ठलाई सच्चा श्रद्धाञ्जली हुने बताए ।

यसअघि एन्फाले स्वर्गीय श्रेष्ठको छोरा र छोरीको उच्च शिक्षासम्म आर्थिक भार बेहोर्ने निर्णय गरेपनि एन्फाले अब स्नातकसम्मको जिम्मेवारी लिने अध्यक्ष नेम्वाङले वचन दिए ।

श्रेष्ठको २०६२ जेठ २९ गते भैंसेपाटीस्थित नयाँ घरमा सरेकै राति करेन्ट लागेर निधन भएको थियो।