काठमाडौं (हाम्रो खेलकुद) – अर्को महिना हुने साफ महिला यू२० च्याम्पियनसिपमा नेपालसहित ४ राष्ट्रले मात्र सहभागिता जनाउने भएका छन् ।

बंगलादेशको ढाकास्थित बसुन्धरा स्पोर्ट्स एरिनामा हुने प्रतियोगितामा आयोजक, नेपाल, श्रीलंका र भुटानले खेल्नेछन् । डबल राउन्ड रोबिनका आधारमा ११ देखि २१ जुलाईसम्म प्रतियोगिता हुनेछ । लिगको समापनमा शीर्षस्थानमा रहने टोलीले नै उपाधि जित्ने प्रावधान रहेको छ ।

सन् २०२४ मा यू१९ उमेर समूहमा भएको पछिल्लो संस्करणमा भारत र बंगलादेशले उपाधि बाँडेका थिए । उक्त फाइनल १-१ को बराबरी र टाइब्रेकर र सडन डेथमा ११-११ को स्थिति भएपछि रेफ्रीले कोइन टस गर्दै भारतलाई विजेता घोषित गर्दा विवाद भएपछि साफले दुवैलाई संयुक्त विजेता घोषित गरेको थियो ।

हालसम्म यू१८, यू१९ र यू२० उमेर गरेर ५ संस्करण सम्पन्न हुँदा नेपाल २ पटक उपविजेता र ३ पटक तेस्रो स्थान प्राप्त गरेको छ । बंगलादेश ४ पटक र भारत १ पटक विजेता रहेका छन् ।

नेपालले प्रतियोगिताका लागि विगत ३ सातादेखि प्रशिक्षण गर्दै आएको छ । याम गुरुङको मुख्य प्रशिक्षणमा टोली निर्माण भएको छ । जिल्ला र प्रदेश हुँदै विभिन्न छनोटबाट आएका खेलाडीबाट ४० सदस्यीय टोली हाल प्रशिक्षणमा छ ।

प्रशिक्षणमा रहेका खेलाडीहरु:

अमिता भुल, अनिशा राइ, अस्मिता गुरुङ, अवाणी राजेश्वरी, वर्षा ओली, भावना परियार, बिर्सना चौधरी, गङ्गा रोकाया, गायत्री मल्ल, झुमा विक, जुना तामाङ, कविता गुरुङ, करुणा बुढाथोकी, कुसुम खतिवडा, लिला चन्द, लिला जोशी, मनिषा सेन, मारिना लामा, माया मास्के, मिना देउवा, प्रतिमा शर्मा, पुनम चेम्जोङ, पुर्णिमा राई, रोजिता बिष्ट, रुपा लिम्बू, सविता मण्डल, सजिना स्याङतान, समिक्षा मगर, संगीता अधिकारी, सानिमा माया लो, सरिता कुमारी नाथ, सेमीहाङमा लिम्बू पंधक, सेनु परियार, सिता रोकाया, सिमरन राई, सुजाता तामाङ, सुक्रिया मिया, सुनिता सुनार, सुनिता विक, सुशिला केसी

मुख्य प्रशिक्षक : याम प्रसाद गुरुङ

सहायक प्रशिक्षक : सन्देश कुमार श्रेष्ठ, किरण कुमार कार्की

गोलरक्षक प्रशिक्षक : मिन बहादुर बस्नेत

व्यवस्थापक : इन्दु दुवाल