एजेन्सी – विश्व फुटबलको सर्वोच्च निकाय फिफाले यसै वर्षदेखि नयाँ ढंगले सुरु गर्न लागेको फिफा क्लब विश्वकप शनिबार सुरु हुँदैछ । अमेरिकामा हुने प्रतियोगिताको पहिलो खेल नेपालमा भने स्थानीय समयअनुसार आइतबार विहान ५:४५ बजे सुरु हुनेछ । उद्घाटन खेलमा अल अहली र इन्टर मायमी खेल्नेछन् ।

सन् २००० देखि फिफाले हरेक वर्ष महादेशीय क्लब प्रतियोगिताको विजेतालाई समेटेर क्लब विश्वकप आयोजना गर्दै आएको थियो । तर यसपटकदेखि भने नयाँ संरचनामा क्लब विश्वकप हुँदैछ । प्रतियोगितामा विश्वभरका उत्कृष्ट ३२ टोलीले प्रतिस्पर्धा गर्दैछन् । ८ समूहमा टोली विभाजन गरेपछि हरेक समूहका शीर्ष २ टोलीले नकआउट चरण खेल्दै फाइनलसम्म पुग्नेछन् ।

फिफाले विश्व फुटबलमा बलियो मानिएको युइएफएलाई १२ र दक्षिण अमेरिकाको कन्मेबललाई ६ स्थान दिएको छ । त्यस्तै ओसेनिया क्षेत्रबाट मात्र १ क्लबले विश्वकपमा स्थान बनाउने प्रावधान रहेको छ । एसिया, अफ्रिका र कन्काकाफबाट ४-४ टोलीले प्रतिस्पर्धा गर्दैछन् । आयोजक राष्ट्र अमेरिकाबाट नियमित एमएलएस सिजनको विजेता इन्टर मायमीले पनि प्रतिस्पर्धा गर्ने अवसर पाएको छ ।

छनोटका दौरान मेक्सिकोबाट विश्वकपका लागि योग्य रहेका दुई टोलीको एकै मालिक रहेपछि फिफाले क्लब लिओनलाई भने सहभागिता जनाउन दिएन । लास एन्जेलस एफसीले लिओनको स्थानमा क्लब विश्वकप खेल्दैछ ।

फिफाले हरेक देशबाट अधिकतम २ टोलीले मात्र क्लब विश्वकपमा छनोट हुने प्रावधान राखेको छ । तर महादेशीय प्रतियोगिताको विजेता नै बनेको अवस्थामा भने २ भन्दा बढीले सहभागिता जनाउन पाउनेछन् । उपाधि विजेताबाहेक टोलीको छनोट भने वरीयताका आधारमा हुनेछ ।

उदाहरणका लागि बार्सिलोनाले यसपटक क्लब विश्वकप खेल्नेछैन । स्पेनबाट रियल म्याड्रिड २०२१-२२ सिजनको च्याम्पियन्स लिगको विजेताको रुपमा र एटलेटिको यूएईएफए वरीयताको छैटौं उत्कृष्ट टोलीको स्थानमा रहेर विश्वकप खेल्दैछ ।

समूह विभाजन:

समूह ए : पाल्मेरस (ब्राजिल), एफसी पोर्टो (पोर्चुगल), अल अहली (इजिप्ट), इन्टर मायमी (अमेरिका)

समूह बी : पेरिस सेन्ट जर्मेन (फ्रान्स), एटलेटिको म्याड्रिड (स्पेन), बोटफोगो (ब्राजिल), सिआटल साउन्डर्स (अमेरिका)

समूह सी : बायर्न म्युनिख (जर्मनी), अक्ल्यान्ड सिटी (न्युजिल्याण्ड), बोका जुनिअर्स (अर्जेन्टिना), बेन्फिका (पोर्चुगल)

समूह डी : फ्लामेंगो (ब्राजिल), एस्पेरेन्स डे टुनिस (ट्युनिसिया), चेल्सी (इंग्ल्यान्ड), लास एन्जेलस एफसी (अमेरिका)

समूह ई : रिभर प्लेट (अर्जेन्टिना), उरावा रेड डायमन्ड्स (जापान), मोन्टरे (मेक्सिको), इन्टर मिलान (इटाली)

समूह एफ : फ्लुमीनेन्स (ब्राजिल), बोरुसिया डर्टमुन्ड (जर्मनी), उल्सान एचडी (दक्षिण कोरिया), मामेलोदी सनडाउन्स (दक्षिण अफ्रीका)

समूह जी : म्यानचेस्टर सिटी (इंग्ल्यान्ड), वाइडाड एसी (मोरक्को), अल आइन (यूएई), युभेन्टस (इटाली)

समूह एच : रियल म्याड्रिड (स्पेन), अल हिलाल (साउदी अरब), पाचुका (मेक्सिको), रेड बुल साल्जबर्ग (अष्ट्रिया)