काठमाडौं (हाम्रो खेलकुद) – इंग्लिस प्रिमियर लिगको फ्यान्टसी प्रिमियर लिग खेलमा लिग संचालन गर्दै आइरहेको इपिएल रमाइलो नेपाल (इआरएन) ले सन् २०२४/२५ को पुरस्कार विजेतालाई पुरस्कृत गरेको छ ।

इङ्ग्लिस प्रिमियर लिग क्लबका समर्थकहरुले सन्चालन गरेको समुह इआरएनले वर्षेनी आयोजना गर्दै आएको फ्यान्टसी लिगको गत सिजनको विजेता सुवास सुवेदी रहे । उनले २ लाख रुपैयाँ प्राप्त गरे । त्यस्तै उपविजेता राजु तिमल्सिनाले १ लाख रुपैयाँ हात पारे । दुवै टोटेनहम हट्सपरको समर्थक हुन् ।

कार्यक्रमकै अवसरमा इआरएनले खेलाडी सहायता कोषको पनि स्थापना गरेको छ । नेपाली घरेलु फुटबल खेलाडीहरु घाइते हुँदा वा अन्य आपतकालिन अवस्थामा केही आर्थिक सहायता गरेर खेलाडीको मनोबल उच्च कायम राख्न मद्दत गर्ने उद्देश्यले यो कोष स्थापना गरिएको सस्थाका अध्यक्ष अरविन्द मरासिनीले बताए । हाल रु ५० हजारको अक्षयकोषबाट यो कोषको सुरु गरिएको छ भने प्रत्यक वर्ष रु ५० हजार थप गर्दै जाने आयोजकले जनाएको छ ।

सन् २०१७ देखि सामाजिक सन्जालमा सक्रिय इआरएनले खेलसँगै विभिन्न सामाजिक कार्यहरु पनि गर्दै आएको छ । कार्यक्रममा वरिष्ठ खेल पत्रकार तथा ‘स्वर्णकथा नेपाली फुटबलको’ पुस्तकका लेखक हिमेशरत्न बज्राचार्यको प्रमुख अतिथि थिए ।