सुशील पन्त क्षेत्री,भरतपुर

सूर्यपुर एफसीले चौथो पेन्गुईन भरतपुर २४ गोल्डकप फुटबलको उपाधि जितेको छ । हानामी भरतपुर फुटबल क्लब (बिएफसी) लाई आइतवार ३-१ ले हराउँदै सूर्यपुर च्याम्पियन बनेको हो ।

दोस्रो पटक यस प्रतियोगितामा सहभागी सूर्यपुरले पहिलो पटक उपाधि जितेको हो । पहिलो संस्करणको विजेता बिएफसी भने चौथी संस्करणमा उपविजेतामा सीमित भएको छ ।

सूर्यपुरको जितमा बिक्की चामलिङ राईले २ र जय गुरुङले १ गोल गरे । बिएफसीले एक उपहार गोल पाएको थियो ।

खेलमा अग्रता भने बिएफसीले लियो । खेलको नवौं मिनेटमा राम थापाको आत्मघाती गोलमा बिएफसीले अग्रता लियो । तर अग्रता धेरै समय टिकेन । १९ औं मिनेटमा जयले गोल गर्दै खेललाई बराबरी गरे ।

२४ औं मिनेटमा बिक्कीले गोल गर्दै सूर्यपुरलाई अग्रता दिलाए । २७ औं मिनेटमा बिक्कीले व्यक्तिगत दोस्रो गोल गरेपछि सूर्यपुर विजयी भयो । बिक्की फाइनलको प्लेयर अफ दि म्याच भए ।

च्याम्पियन सूर्यपुरले ट्रफीसहित ३ लाख ३ हजार र बिएफसीले १ लाख ७५ हजार रुपैयाँ प्राप्त गरेको छ ।सूर्यपुरका जय गुरुङ प्लेयर अफ दि सिरिज भए । उनले १० हजार रुपैयाँ प्राप्त गरे ।

सूर्यपुरकै प्रदिप भण्डारी उत्कृष्ट गोलरक्षक, रोशन उत्कृष्ट प्रशिक्षक तथा बिएफसीका निर्मल घिसिङ उत्कृष्ट डिफेन्डर चुनिए । उनीहरुले समान ५ हजार रुपैयाँ प्राप्त गरे ।

भरतपुर २४ गोल्डकप उपभोक्ता समितिको आयोजनामा भएको प्रतियोगितामा ८ टोली सहभागी थिए ।