काठमाडौं (हाम्रो खेलकुद) – उज्वेकिस्तानमा हुने एएफसी महिला एसियन कप २०२६ को छनोट चरणका लागि नेपालले अन्तिम टोली घोषणा गरेको छ ।

नवनियुक्त प्रशिक्षक प्याट्रिक डे वाइल्डले अनुभवी खेलाडीलाई प्राथमिकतामा राख्दै अन्तिम टोलीको घोषणा गरेका हुन् । यसपटक टोलीमा डिफेन्डर प्रतीक्षा चौधरी पहिलोपटक टिममा परेकी छिन् । एपिएफबाट राइट ब्याक पोजिसनमा खेल्ने उनी टोलीमा रहँदा पछिल्लो छनोटबाट सुष्मा तामाङ र तुलसा बोहोरा भने टिममा परेनन् ।

नेपाल र आयोजक उज्वेकिस्तानसँगै समूह एफ मा लाओस र श्रीलंका पनि रहेका छन् । हरेक समूहको विजेताले अष्ट्रेलियामा हुने एसियन कप खेल्नेछन् । नेपालले लाओससँग १५ असार (२९ जुन), श्रीलंकासँग १८ असार (२ जुलाई) र उज्वेकिस्तानसँग २१ असार (५ जुलाई) मा खेल्नेछ ।

नेपालले हालसम्म उज्वेकिस्तानविरुद्ध खेलेको सबै ३ खेल हारेको छ । लाओसविरुद्ध हालसम्म नखेलेको नेपालले श्रीलंकामाथि भने सबै ८ खेलमा जितको नतिजा निकालेको छ ।

छनोटमा सहभागी ३४ टोलीलाई ८ समूहमा विभाजन गरिएको हो । एसियन कप सन् २०२६ मार्चमा अष्ट्रेलियामा हुँदैछ । प्रतियोगितामा १२ टोली सहभागी हुनेछन् । आयोजक अष्ट्रेलियासँगै चीन, दक्षिण कोरिया र जापान भने छनोट भइसकेका छन् ।

नेपाली टिम :

गोलरक्षक : एन्जिला तुम्बापो सुब्बा, उषा नाथ, अन्जना राना मगर

डिफेन्डर : गीता राना, निशा थोकर, समिक्षा घिमिरे, मनमाया दमाइ, प्रतीक्षा चौधरी, विमला विक, पुजा राना, अमृता जैशी

मिडफिल्डर : विमला चौधरी, अनिता बस्नेत, रेनुका नगरकोट, प्रिती राई, सरु लिम्बू, सविता रानामगर, सरस्वती हमाल

फरवार्ड : सावित्रा भण्डारी, रश्मीकुमारी घिसिङ, चन्द्रा भण्डारी, अनिता केसी, रेखा पौडेल