काठमाडौं (हाम्रो खेलकुद) – नेपालका कुनै पनि क्लबले एसियाली फुटबल महासंघ (एएफसी) को प्रतियोगिता खेल्न आवश्यक लाइसेन्स प्राप्त गर्न नसकेको सार्वजनिक भएको छ ।

कुनैपनि क्लबले लाइसेन्स प्राप्त नगरेसँगै २०२५/२६ सिजनमा एएफसीको क्लब प्रतियोगितामा नेपालको सहभागिता नहुने निश्चित भएको छ । गत सिजन ए डिभिजन लिगको च्याम्पियन चर्च ब्वाइज युनाइटेडले एएफसी क्लब लाइसेन्स प्राप्त गर्दै एएफसी च्यालेन्ज लिगको प्लेअफ खेलेको थियो । तर यस सिजन भने नेपालका कुनै क्लबले लाइसेन्स प्राप्त गर्न सकेनन् ।

एएफसीले क्लब संचालनका आवश्यक रहेको न्यूनतम आवश्यकता पूरा गरे मात्र एएफसीको क्लब लाइसेन्स प्रदान गर्दै आएको छ । एएफसीले च्याम्पियन्स लिग एलिट र टु को लागि कडा प्रावधान राखेपनि च्यालेन्ज लिग खेल्ने क्लबहरुका लागि भने निकै सहज प्रावधान राखेको छ । जस अनुसार भुटानबाट मात्र ४ क्लबले एएफसी लाइसेन्स प्राप्त गरेका थिए । यस सिजन पनि लिग च्याम्पियन पारो एफसीले च्यालेन्ज लिग खेल्दैछ । तर नेपालबाट भने कुनै क्लबले लाइसेन्स पाएका छैनन् ।

यता नेपालको भने सहभागिता शून्य भएसँगै एएफसीको वरीयतामा अंक थप्ने सम्भावना गुमेको छ । एएफसी च्यालेन्ज लिगको वरीयतामा नेपालको ०.९१७ अंक छ । समग्र एएफसीमा ३८ औं स्थानमा रहेको नेपाल पश्चिम क्षेत्रमा भने २० औं स्थानमा छ । एएफसी प्रतियोगितामा देशको क्लबले गरेको प्रदर्शनको आधारमा अंक दिइने गरिन्छ । वरियतामा स्थान अनुसार नै क्लबहरुको सहभागी संख्या पनि निर्णय हुन्छ ।

नेपालले यसपटक सहभागिता नजनाएसँगै आब भुटानले नेपाललाई उछिन्ने अवसर बनेको छ । हाल भुटान ०.५०५ अंकका साथ नेपालभन्दा २ स्थान पछि छ । नेपालभन्दा पछि श्रीलंका (०.५५५), भुटान (०.५०५), ब्रुनाई (०.१) र अफगानिस्तान (०.०७५) छन् । पाकिस्तान, यमन, गुआम, नर्दर्न मारियाना आइल्याण्ड र टिमोर लेस्टको कुनै अंक छैन र संयुक्त ४३ औं स्थानमा छन् ।

नेपालमा यसैपनि यसपटक लिग संचालन हुन नसकेका कारण एएफसीको प्रतियोगितामा कुन क्लबले सहभागिता जनाउने भन्ने मै प्रष्टता थिएन । एन्फाले नेपाल सुपर लिगको समापन लगत्तै एन्फा प्रेसिडेन्ट कप गराउने जमर्को गरेपनि क्लबहरु राजी नहुँदा त्यो सम्भव भएको थिएन । तर कुनैपनि क्लबले एएफसी क्लब लाइसेन्स नै प्राप्त नगरेको अवस्थामा नेपालको सहभागिता नहुने पक्का भएको हो ।