एजेन्सी – लियोनेल मेस्सीको २ गोल र २ असिस्टको मद्दतमा इन्टर मियामीले शनिवार न्यूयोर्क रेड बुल्सलाई ५-१ ले पराजित गरेको छ।

न्यू जर्सीको ह्यारिसनमा मियामीले पुनरागमन जित निकालेको हो। मियामी (१२ जित, ४ बराबरी, ५ हार) को एमएलएस इस्ट कन्फ्रेन्समा ४१ अंक पुगेको छ।

पहिलो हाफमा १–० ले पछि परेको अवस्थामा खेलमा फर्कियो। टेलास्को सेगोभियाको २ गोलसहितको आक्रमणबाट मियामीले पहिलो हाफ सकिनुअघि नै ३–१ को अग्रता बनाएको थियो।

बुधवार सिन्सिनाटीविरुद्ध ५ खेलको जितको शृंखला टुटेपछि मियामीले सातौं खेलमा छैटौं जित दर्ता गर्‍यो। यी ७ खेलमध्ये मेस्सीले ६ पटक दुई गोल गरेका छन्।

रेड बुल्स घरेलु मैदानमा लगातार जित निकाल्न असफल रह्यो । मियामीसँग यो सिजन दोस्रो पटक पराजित भयो।
रेड बुल्सका लागि खेलको १५औं मिनेटमा अलेक्जेन्डर ह्याकले गोल गर्दै अग्रता दिलाए ।

मियामीका नियमित गोलकिपर ओस्कार उस्तारी चोटका कारण अनुपस्थित हुँदा रोक्को रियस नोभोले सिजनको दोस्रो पटक सुरुवात गरे ।

२४औं मिनेटमा मेस्सीको क्रसमा जोर्डी आल्बाले एमएलएस लिग खेलमा आफ्नो पहिलो गोल गर्दै स्कोर १-१ बराबरीमा ल्याए। त्यसको तीन मिनेटमा आल्बाको क्रसमा सेगोभियाले गोल गरे।

पहिलो हाफको इन्ज्युरी समयको तेस्रो मिनेटमा रेडोन्डोले रेड बुल्सको बक्समा बल पुर्याए तर प्रहार गर्न सकेनन्। तर सेगोभियाले रिबाउन्डमा गोल गर्दै स्कोर ३–१ बनाए।

६०औं र ७५औं मिनेटमा मेस्सीले २ गोल गर्दै मियामीको जित निश्चित गरे। घरेलु टोली रेड बुल्सको मैदान भए पनि मियामी समर्थकहरू मेस्सीको प्रदर्शनबाट उत्साहित थिए। मेस्सीले यो सिजन एमएलएसमा आफ्नो गोल संख्या १८ पुर्‍याएका छन्।