काठमाडौं (हाम्रो खेलकुद) – विभागीय टोली त्रिभुवन आर्मी फुटबल क्लबले भारतमा जारी रहेको डुरान्ड कपको पहिलो खेलमा जमशेदपुर एफसीसँग हार बेहोरेको छ ।

जेआरडि स्पोर्टस कम्प्लेक्स, जमशेदपुरमा भएको समूह सि को पहिलो जमशेदपुर फुटबल क्लबले आर्मीलाई ३-२ गोल अन्तरले पराजित गरेको हो ।

जमशेदपुरको जितमा सार्थक, मनविर र निखिलले समान १ गोल गरे । आर्मीका लागि कप्तान जर्जप्रिन्स कार्की र अनन्त तामाङले गोल गरे ।

खेलको चौथो मिनेटमा नै सार्थकको गोलमा घरेलु टोलीले अग्रता लियो । तर, २६औं मिनेटमा गोल गर्दै आर्मीका कप्तान जर्जप्रिन्सले खेलमा बराबरी गरे । ३१औं मिनेटमा गोल थप्दै मनविरले जमशेदपुरलाई अग्रता दिलाए ।

६४औं मिनेटमा अनन्तले गोल गर्दै आर्मीलाई फेरि बराबरीमा पुर्याए । ७१औं मिनेटमा जमशेदपुरका निखिलले गोल गर्दै टोलीलाई जित दिलाए ।

मेघराज केसीको प्रशिक्षणमा रहेको आर्मीले दोस्रो खेल साउन १७ गते शनिवार लडखा फुटबल क्लबसँग खेल्नेछ । समूह चरणको अन्तिम खेल साउन २० गते इण्डियन आर्मी फुटबल टिमसँग खेल्नेछ ।

२४ टोलीको सहभागिता रहेको प्रतियोगिताको हरेक समूहको विजेताले नकआउट चरणमा पुग्नेछ । ६ समूहका उत्कृष्ट दुई उपविजेता पनि क्वाटरफाइनलमा प्रवेश गर्नेछन् ।

प्रतियोगिताको सबै खेलको प्रत्यक्ष प्रसारण सोनी स्पोर्टस २ र सोनी लिभले गरिरहेको छ ।