काठमाडौं (हाम्रो खेलकुद) – एन्फा यु-१६ युथ लिगमा शीर्ष स्थानको नेपाल पुलिस क्लबले अर्को जित हासिल गरेको छ ।

सातदोबाटोस्थित एन्फा कम्प्लेक्समा बुधवार आफ्नो दसौँ खेलमा आठौं जित निकाल्ने क्रममा पुलिसले संकटा क्लबलाई ४-१ ले पराजित गर्यो ।

पुलिसको जितमा समिर कुमारले २ तथा रिजन राज गौतम र मेस्सी विर विक्रम शाहले समान १ गोल गरे । संकटाका लागि पेम्बा तामाङले सान्त्वना गोल गरे ।

१३औं मिनेटमा रिजनले गोल गर्दै पुलिसलाई सुरुवाती अग्रता दिलाए। समिरले १७औं मिनेटमा गोल गर्दै पुलिसको अग्रता दोब्बरको बनाए । ५२औं मिनेटमा पेम्बाले गोल गर्दै संकटालाई खेलमा फर्काउने कोसिस गरे ।

८५औं मिनेटमा मेस्सीले पुलिसका लागि अर्को गोल थपे । इन्ज्युरी समयमा समिरले व्यक्तिगत दोस्रो गोल गर्दै पुलिसलाई ४-१ को जित दिलाए ।

पुलिस १० खेलबाट २५ अंक भएको छ । समान खेल खेलेको संकटा १९ अंकका साथ चौथो स्थानमा छ।

आजै पहिलो खेलमा अर्को विभागीय टोली नेपाल एपिएफ क्लबलाई श्री भगवती क्लबले २-२ को बराबरीमा रोकेको छ ।

एपिएफका लागि ४०औं मिनेटमा आयुष सरकार तथा ८४औं मिनेटमा पुजन ढकालले गोल गरे । श्री भगवतीका लागि ८९औं मिनेटमा सबिर श्रेष्ठ र इन्ज्युरी समयमा अनिल परियारले पेनाल्टी मार्फत गोल गर्दै खेल बराबरीमा टुंगाए ।

१० खेलमा एपिएफको १६ अंक र श्री भगवतीको १० अंक छ ।