एजेन्सी – केलियन एम्बाप्पेले नयाँ सिजनमा रियल मड्रिडको नम्बर १० जर्सी लगाउने भएका छन्। उनले रियलमा आफ्नो पहिलो सिजनमा ९ नम्बर जर्सी लगाएका थिए।

लुका मोड्रिच रियल छाडेपछि १० नम्बर जर्सी खाली थियो। सामान्यतया रियल मड्रिडले दीर्घकालीन खेलाडीलाई प्राथमिकता दिने नीतिको पालन गर्ने भए पनि, एमबाप्पेले आफ्नो स्टार छविका कारण यो नम्बर पाएका हुन्।

यो नम्बर एमबाप्पेका लागि व्यक्तिगत महत्व पनि राख्छ । उनी फ्रान्सको राष्ट्रिय टोलीका लागि यही नम्बर लगाउँछन्। उनले आफ्नो आत्मकथात्मक कमिक पुस्तकमा समेत एउटा बाल्यकालीन दृश्य समावेश गरेका छन्। जहाँ उनी नम्बर १० को रियल मड्रिडको जर्सी खोलिरहेका हुन्छन्।

भिनिसियस जुनियरले पहिले नै नम्बर ७ लगाइसकेका छन् । जुन नम्बर एमबाप्पेका आदर्श क्रिस्टियानो रोनाल्डोले लगाउने गर्थे । त्यसैले फ्रेन्च फरवार्डले अर्को सबैभन्दा प्रतिष्ठित नम्बर १० रोजेका हुन्।

रियलको इतिहासमा नम्बर १० जर्सीले ठूलो महत्त्व राखेको छ । यसअघि रियलमा लुइस फिगो, मेसुत ओजिल, क्लारेन्स सिडोर्फ र फेरेन्क पुस्कासजस्ता महान खेलाडीले यो नम्बर लगाइसकेका छन्।

स्पेनमा आफ्नो पहिलो सिजनमा एम्बाप्पेले ५९ खेलमा ४४ गोल गर्दै ५ असिस्ट गरेका थिए।‌ बार्सिलोनाले पनि नयाँ सिजनको लागि नम्बर १० जर्सी लमिन यामाललाई दिएको छ।