काठमाडौं (हाम्रो खेलकुद)- एएफसी यू-२० महिला एसियन कप छनोट प्रतियोगितामा नेपालले आज साउदी अरेबिया विरूद्ध १-० को कठिन जित निकालेको छ। यो जितमा नेपालले ३ अंक जोड्यो।

भुटानको थिम्पुमा भएको खेलमा पहिलो हाफमा दुवै टिमबाट गोल हुन सकेन। तुलनात्मक रुपमा कमजोर मानिएको साउदी विरूद्ध नेपालले गोल गर्न संघर्ष गर्यो।

३७ औं‌‌ मिनेटमा प्राप्त पेनाल्टीमा मिना देउवाको प्रहार पोष्टमा लाग्यो।‌ नेपालले गोल गर्ने सुनौलो अवसर गुमायो। साउदीले पनि गोल गर्न केहि उत्कृष्ट मौकालाई सदुपयोग गर्न सकेन । पहिलो हाफ गोल रहित बराबरीमा सकियो।

दोस्रो हाफमा पनि दुवै टोलीले गोल गर्न नसक्दा खेल बराबरीतर्फ उन्मुख हुँदा ९० औं मिनेटमा नेपालले गोल गर्यो।

मिनाको पासमा शुक्रिया मियाको ट्याप‌इनले सही दिशा लियो।‌ यो गोल नै निर्णायक गोल बन्दा नेपाल साउदीलाई १-० ले हरायो।

यसअघि नेपाल आयोजक भुटानसँग १-१ गोलको बराबरीमा रोकिएको थियो। साउदी अरेबिया आफ्नो पहिलो खेलमा उत्तर कोरियासँग १५ -० को फराकिलो नतिजामा पराजित भएको थियो।

भुटानसँग बराबरी खेलेपछि नेपालको समूह विजेता बन्ने होडमा धक्का लगिसकेको छ। अब नेपालले बलियो प्रतिद्वन्द्वी उत्तर कोरियासँग आइतवार खेल्नेछ।

यस प्रतियोगिताबाट प्रत्येक समूहको विजेता एएफसी यू-२० महिला एसियन कपमा छनोट हुनेछन्। साथै ३ उत्कृष्ट उपविजेता टोली पनि छनोट हुनेछन्।