काठमाडौं (हाम्रो खेलकुद) – नेपाली फरवार्ड अञ्जन विष्टसम्मिलित आई–लिग टोली रियल कश्मीर एफसीले डुरान्ड कपमा अर्को जित हासिल गरेको छ ।

खुमान लम्पक मुख्य रंगशालामा आइतवार समूह ‘एफ’ को खेलमा कश्मीरले घरेलु टोली नेरोका एफसीलाई ३-१ ले पराजित गरेको हो । यो जितपछि कश्मीरको अर्को चरण प्रवेशको सम्भावना कायम छ ।

कश्मीरको जितमा रञ्जन सिंह, मारेत तारिक र मोडु म्बेङ्गुले गोल गरे । लुकास चागासले नेरोकाका लागि गोल गरे । रञ्जनले ३२औं मिनेटमा गोल गर्दै कश्मीरलाई अग्रता दिलाए ।

नेरोकाका चागासले ६७औं मिनेटमा बराबरी गोल गरे । मारेतले ७०औं र मोडुले ८२औं मिनेटमा गोल गर्दै टोलीको जित पक्का गरे ।

कश्मीरले ३ खेलमा ६ अंकसहित समूह चरणको यात्रा समाप्त गरेको छ । २ अंक जोडेको नेरोक साथ प्रतियोगिताबाट बाहिरिएको छ ।

इन्डियन नेभी र ट्राउ एफसीबीच मंगलवार हुने अन्तिम खेलपछि यो समूहको विजेता र नकआउट चरणमा पुग्ने टोलीको टुंगो लाग्नेछ।

इण्डियन नेभी ४ अंकका साथ समूहको शीर्ष स्थानमा छ । नेपाली टोली त्रिभुवन आर्मी फुटबल क्लब भने प्रतियोगिताबाट बाहिरिसकेको छ ।

२४ टोलीको सहभागिता रहेको प्रतियोगिताको हरेक समूहको विजेताले नकआउट चरणमा पुग्नेछ । ६ समूहका उत्कृष्ट दुई उपविजेता पनि क्वाटरफाइनलमा प्रवेश गर्नेछन् ।