काठमाडौं (हाम्रो खेलकुद) – नेपाली यू १५ फुटबल टोलीले श्रीलंकामा आयोजना हुने एसएफटी दक्षिण एसिया जापान यू १६ फुटबल एक्सेन्ज प्रोगाममा भाग लिने भएको छ । बिहीबार त्यसतर्फ जाने टोलीलाई अखिल नेपाल फुटबल संघ (एन्फा) ले बुधबार विदाई गरेको छ ।
श्रीलंका जाने टोलीमा १८ खेलाडीसहित २४ जना छन् । मधुसुदन उपाध्यायको नेतृत्वमा रहेको टोलीको मुख्य प्रशिक्षक सुनिकुमार श्रेष्ठ रहेका छन् । एन्फा अध्यक्ष नरेन्द्र श्रेष्ठ, कार्यवाहक महासचिव सञ्जिव मिश्र, प्रमुख कार्यकारी अधिकृत इन्द्रमान तुलाधर, एएफसी विकास अधिकृत योगेश देसाई र एएएफसी लिग मेनजमेन्ट एक्पर्ट कन्स्लट्यान्ट ट्रोय म्याककोले टोलीको विदाई गरेका थिए ।
अध्यक्ष श्रेष्ठले टोलीलाई शुभकामना दिदै अभ्यासमा सिकेका ज्ञानलाई मैदानमा उतार्न सुझाव दिए । नेपालले भुटानको यू १६ सँग मार्च ११मा, जापानको यू १५ सँग मार्च १२ र आयोजक श्रीलंकासँग मार्च १४ मा प्रतिस्पर्धा गर्नेछ । टोली मार्च १५ मा स्वदेश फर्कनेछ ।
