चितवन गोल्डकप स्थगित

सुशील पन्त क्षेत्री,चितवन

चितवन गोल्ड कप फुटबल प्रतियोगिताको तेस्रो संस्करण तत्कालका लागि स्थगित भएको छ ।

आयोजक भरतपुर फुटबल क्लब बिएफसीले आज प्रेस विज्ञप्ति जारी गर्दै असोज ४ गतेदेखि हुने भनिएको प्रतियोगिता तत्कालका लागि स्थगित भएको जानकारी दिएको छ ।

देशको पछिल्लो राजनीतिक घटनाक्रम र केही प्राविधिक तयारी समेत नपुगेकोले तत्कालका लागि प्रतियोगिता स्थगित गरिएको विज्ञप्तिमा उल्लेख छ ।

आन्तरिक तयारीमा जुटिरहेको बेला देखिएको प्राविधिक समस्या र देशको पछिल्लो अवस्थाका कारण पूर्वनिर्धारित समयमा प्रतियोगिता आयोजना गर्न सम्भव नभएको संयोजक धुर्व भुसालले जारी गरेको विज्ञप्तिमा उल्लेख छ।

अवस्था सामान्य भएसँगै नयाँ मिति घोषणा गरेर तयारी जुट्ने पनि भुसालले बताए । यस अघि प्रतियोगिता असोज ४ देखि १३ गतेसम्म नेपाल प्रहरी शिक्षालय भरतपुर तालिम केन्द्रको मैदान हुने तय थियो ।

चितवन गोल्डकप पहिलो पटक त्रिभुवन आर्मी फुटबल क्लब‌‌ र दोस्रो पटक बुटवल लुम्बिनी एफसीले जितेको थियो ।