एजेन्सी – च्याम्पियन्स लिमा बायर्न म्युनिख र इन्टर मिलानले विजयी सुरुवात गरेका छन्। बायर्नले एलिएन्ज एरिनामा चेल्सीलाई ३–१ ले पराजित गरेको छ।

खेलको २० औं मिनेटमा चेल्सीका ट्रेभो चालोबाहको आत्मघाती गोलले बायर्नले अग्रता लियो। २७ औं मिनेटमा हेरी केनले पेनाल्टीमार्फत दोस्रो गोल थपे।

तर दुई मिनेटमै चेल्सीले खेलमा फर्कने प्रयास गर्‍यो। कोल पाल्मरले गोल गरे। दोस्रो हाफमा प्रशिक्षक भिन्सेन्ट कोम्पानीले रणनीतिमा परिवर्तन गरेपछि बायर्नले अर्को गोल गर्यो । ६३ औं मिनेटमा केनले व्यक्तिगत दोस्रो गोल गरेपछि टोली ३-१ विजयी भएको हो ।

अर्को खेलमा इन्टरले आयाक्सलाई २-० ले पराजित गरेको छ। मार्कस थ्युरामले दुईवटा हेडर गोल गर्दै इन्टरलाई जित दिलाए । थ्युरामले पहिलो गोल ४२ औं र अर्को गोल ४७ औं मिनेटमा गरे।

पिएसजीको फराकिलो जित
साविक विजेता पेरिस सेन्ट–जर्मेन (पिएसजी) ले विजयी सुरुवात गरेको छ। ४ खेलाडीले गाोल गरेको खेलमा पिएसजीले इटालियन क्लब एटलान्टामाथि ४–० को प्रभावशाली जित निकालेको छ।

पार्क दे प्रिन्समा भएको खेलमा घरेलु टोलीले सुरुवातमै गोल गर्दै दबाब बनायो। खेलको तेस्रो मिनेटमा कप्तान मार्किन्होस ले हेडरमार्फत पहिलो गोल गरे। त्यसपछि ३९ औं मिनेटमा जर्जियन स्टार ख्विचा क्वारात्सखेलिया ले गोल गर्दै अन्तर २–० बनाए।

५१ औं मिनेटमा नुनो मेन्डेस ले सुन्दर प्रहारमार्फत तेस्रो गोल थपे। इन्ज्युरी समयको पहिलो मिनेटमा गोनकालो रामोस ले गोल गर्दै स्कोरलाई ४–० मा पुर्‍याए।

अर्को खेलमा कप्तान भर्जिल भ्यान डाइकले इन्ज्युरी समयमा निर्णायक गोल गरेपछि लिभरपुलले एट्लेटिको म्याड्रिडलाई ३–२ ले पराजित गरेको हो ।

चौथो मिनेटमै एन्डी रोबर्ट्सनले गोल गर्दै लिभरपुललाई अग्रता दिलाए। त्यसको दुई  मिनेटपछि मोहम्मद सलाहले अर्को गोल थपेपछि पाहुना टोली २–० ले अघि बढ्यो।

पहिलो हाफको अन्त्यतिर मार्कस लोरटेले एट्लेटिकोका लागि गोल फर्काए। लोरटेले नै ८१ औं मिनेटमा दोस्रो गोल गर्दै खेललाई २–२ को बराबरीमा ल्याए।

बराबराी उन्मुख खेलमा कप्तान भ्यान डाइकले कर्नरमा हेडिङमार्फत गोल गर्दै लिभरपुललाई नाटकीय जित दिलाए।