एजेन्सी– गेब्रियल मार्टिनेलीले इन्ज्युरी समयको तेस्रो मिनेटमा बराबरी गोल गरेपछि आर्सनलले म्यानचेस्टर सिटीलाई १-१ को बराबरीमा रोकेको छ।

इमिरेट्स स्टेडियममा भएको प्रिमियर लिग खेलमा सिटीले खेलको नवौं मिनेटमै अग्रता लिएको थियो। एर्लिङ हालान्ड सिटीका लागि गोल गरेका हुन्।

तिज्जानी रेजेन्डर्सको सहकार्यमा काउन्टर अट्याकमा हालान्डले गोल गरे । त्यसपछि पेप गार्डियोलाको टोलीले अग्रता जोगाउन सुरक्षात्मक खेल्यो।

दोस्रो हाफमा आर्सनलले बुकायो साका र एबेरेची एजेलाई मैदानमा उतारे पनि तत्काल खेलको लय बदल्न सकेन। तर अन्तिम समयमा एजेले डिफेन्स माथिबाट फालेको पासलाई मार्टिनेलीले बराबरी गोल गर्दै टोलीलाई‌ हारबाट जोगाए ।

बराबरीपछि १० अंका साथ आर्सनल दोस्रो स्थानमा पुगेको छ ।‌ शीर्षस्थानमा रहेको साविक विजेता लिभरपुलभन्दा ५ अंकले पछि छ। ७ अंकसहित सिटी नवौँ स्थानमा छ।

आइतवार नै बोर्नमाउथ र न्युक्यासल युनाइटेडबीचको खेल गोलरहित बराबरीमा सकियो। दुवै टोलीले गोल गर्ने अवसरहरू सिर्जना गरे पनि भएनन्। न्युक्यासल लगातार तेस्रो अवे खेलमा बराबरी खेल्न बाध्य भयो।

यस्तै सन्डरल्यान्ड र एस्टन भिल्लाबीचको खेल १-१ को बराबरीमा टुंगियो। म्याटी क्यासले ६७ औं मिनेटमा गोल गर्दै एस्टन भिल्लालाई अग्रता दिलाए।‌

विल्सन इसिदोरले ७५ औं मिनेटमा सन्डरल्याण्डका लागि बराबरी गोल गरे। रेनिल्डो माण्डाभाले ३३ औं मिनेटमा रातो कार्ड पाएपछि घरेलु टोली सन्डरल्यान्ड १० खेलाडीमा सीमित भयो ।