काठमाडौं (हाम्रो खेलकुद)- अखिल नेपाल फुटबल संघ (एन्फा) ले ए डिभिजन फुटबल क्लबसँग आज दिउँसोको लागि तय भएको बैठक स्थगित गरेको छ।

होम-एन्ड-अवेको आधारमा पुस ९ गतेदेखि हुने लिगको विषयमा आज दिउँसो २ बजे एन्फा र ए डिभिजन क्लबबीच बैठक तय भएको थियो।

तर बैठक सुरू हुन करिब ३ घण्टा अगाडि क्लबहरूले दिएको सुझाव र मागहरूका विषयमा आवश्यक तयारी गर्नुपर्ने भएकाले बैठक स्थगित गरिएको एन्फाले पठाएको पत्रमा उल्लेख गरिएको छ।

बैठकका‌ लागि आवश्यक तयारी भने पनि एन्फा कम्प्लेक्सको बाहिर समर्थकहरुले आज आफ्नो विरुद्ध प्रदर्शन गरेपछि एन्फाले बैठक स्थगित गरेको हो। प्रदर्शनका क्रममा एन्फा कम्प्लेक्सको गेट सुरक्षाकर्मी तैनाथ गरिएको थियो।

एन्फाले बैठकको नयाँ मिति तय गरि जानकारी गराउने भनेको छ। हिजो ए डिभिजनका १४ मध्ये ९ क्लब चर्च ब्वाइज युनाइटेड, हिमालयन शेर्पा क्लब, फ्रेन्ड्स क्लब, मछिन्द्र क्लब, जावलाखेल युथ क्लब, एनआरटी , सातदोबाटो युथ क्लब, प्लानिङ ब्वाइज युनाइटेड क्लब, मनाङ मर्स्याङ्दी क्लब र श्री भगवती क्लबले संयुक्त पत्रकार सम्मेलन गरेर सर्त सहित लिग खेल्न तयार रहेको जनाएको थियो।

क्लबले एएफसी क्लब लाइसेन्स सुनिश्चित गर्न माग गरेको थियो। त्योसहित क्लबले एन्फालाई लिग सन्चालनको लागि ११ बुँदे सुझाव दिएको पनि जनाएको थियो।
एन्फा र क्लबबीच लिगको लागि यसअघिको यसअघि बैठक जेन जी प्रर्दशनपछि उत्पन्न परिस्थितिका कारण स्थगित भएको थियो।