हिमाल खरेल / दिपक बोहोरा, झापा

झापाको शिवसताक्षीस्थित दुधे रंगशालामा सुरु भएको एलभिडी झापा महिला गोल्डकपको उद्घाटन खेलमा विभागीय टोली नेपाल पुलिस क्लबले उच्च प्रदर्शन गर्दै पहिलो जित हासिल गरेको छ ।

पुलिसले आज एकतर्फी नतिजा निकाल्दै अर्को ए डिभिजन क्लब चर्च ब्वाइज युनाइटेडलाई ८-० ले पराजित गर्दै सेमिफाइनलमापुगेको छ ।

पुलिसका लागि मिना देउवाले अविश्वसनीय प्रदर्शन गर्दै ५ गोल गरिन् भने रेखा पौडेलले ह्याट्रिक पूरा गरिन् ।

पहिलो हाफमा सावधान र संयमित रूपमा खेल्दै आक्रमणको लय खोजिरहेको पुलिसले ३७औँ मिनेटमा गोलको खाता खोल्यो । राष्ट्रिय टोलीमा हालै मात्र डेब्यु गरेकी मिनाको क्रसमा रेखाले उत्कृष्ट फिनिस गर्दै टोलीलाई अग्रता दिलाइन् ।

दोस्रो हाफमा पुलिसले खेलमा पूर्ण नियन्त्रण कायम गर्‍यो । खेलको ५१औँ मिनेटमा चर्चका डिफेन्डर र गोलकिपरबीच तालमेलको कमीले मिनालाई सहज अवसर दिलायो, जसलाई उनले गोलमा परिणत गर्दै अग्रता दोब्बर बनाइन् । त्यसपछि भने मैदान मिना र रेखाको शोमा परिणत भयो ।

मिनाले ५९औँ, ६२औँ मिनेटमा गोल गर्दै ह्याट्रिक पूरा गरिन् । त्यसपछि उनले ६८औँ र ८१औँ मिनेटमा गोल थप्दै व्यक्तिगत ५ गोल गरिन् ।

रेखाले  ८०औँ मिनेटमा ३० यार्डको दूरीबाट गरिएको सानदार प्रहारमार्फत गोल गर्दै चर्चका गोलकिपरलाई कुनै मौका दिइनन् । इन्ज्युरी समयमा पुनः गोल गर्दै उनले ह्याट्रिक पूरा गरिन् ।

८–० को नतिजासँगै पुलिसले सेमिफाइनलमा सहज प्रवेश गर्‍यो । खेलभरि पुलिसको बल पोजेसन र फिनिसिङ दुवै उत्कृष्ट देखियो भने चर्चको डिफेन्स र गोलकिपिङ कमजोर रह्यो ।

मिना खेलकी ‘प्लेयर अफ द म्याच’ घोषित भइन् । उनले १५ हजार रुपैयाँ र ट्रफी प्राप्त गरिन् । पुरस्कार वितरण नगरप्रमुख मेगाहाङ थोप्रा, प्रतियोगिता संयोजक सन्तोष थोप्रा र ग्यारेज क्याफेका सञ्चालक लुका राईले गरे ।

मंगलबार दोस्रो क्वार्टरफाइनलमा एपिएफ फुटबल क्लब र भारतको सिंग्लिङ स्पोर्टिङ क्लब सिक्किमबीच प्रतिस्पर्धा हुनेछ ।

दुधे रंगशालामा जारी प्रतियोगिताको फाइनल खेल कात्तिक २४ गते हुनेछ । विजेता टोली नगद १० लाख १० हजार रुपैयाँ, उपविजेताले ५ लाख रुपैयाँ, र सर्वोत्कृष्ट खेलाडीले १ लाख ५० हजार रुपैयाँ प्राप्त गर्नेछन् ।

त्यस्तै उत्कृष्ट गोलकिपर, डिफेन्डर, मिडफिल्डर, फरवार्ड, प्रशिक्षक, उदीयमान खेलाडी र उच्च गोलकर्तालाई २५ हजार रुपैयाँका दरले पुरस्कृत गरिनेछ ।

प्रतियोगितामा आज खेल्ने टोलीबाहेक त्रिभुवन आर्मी एफसी, एपिएफ एफसी,संकटा क्लब,झापा एफसी, आरएस पोखरा एफसी र भारतको सिंग्लिङ स्पोर्टिङ क्लबको सहभागिता छ।