काठमाडौं (हाम्रो खेलकुद)- अखिल नेपाल फुटबल संघ (एन्फा) र ए डिभिजनका १४ क्लबको संयुक्त बैठकले एन्फाको पछिल्लो साधारण सभाले ए डिभिजन लिगका विषयमा गरेको अनुमोदनलाई कुल्चेर अर्को निर्णय गरेको छ ।

साधारण सभाले यो वर्षको पुस ९ गतेबाट ए डिभिजन लिग गर्ने एन्फाको प्रस्तावलाई अनुमोदन गरेको थियो। त्यसलाई कुल्चेर एन्फा र क्लबहरुबीचको आज बसेको बैठकले यो वर्ष राष्ट्रिय लिग गर्ने र ए डिभिजन लिग अर्को वर्ष मात्र आयोजना गर्ने संयुक्त निर्णय गरेका छन्।

यो निर्णयले लिगको ए,बि, सीको पिरामिड प्रभावित हुनेछ। यो निर्णयले अर्को वर्ष बी र सो डिभिजन नहुने पक्का भएको छ।
सातदोबाटोस्थित एन्फा मुख्यालयमा आज बसेको बैठकले राष्ट्रिय लिग पुस ९ गते देखि गर्ने सहमति जुटाएको छ। जसमा मात्र १० टोलीबीच प्रतिस्पर्धा हुनेछ। पछिल्लो पटक आयोजना भएको ए डिभिजन लिगका शीर्ष ६ टोली चर्च ब्वाइज, मछिन्द्र फुटबल क्लब, नेपाल पुलिस क्लब, जावलाखेल युथ क्लब, सातदोबाटो युथ क्लब र एनआरटी तथा प्रेसिडेन्ट्स कप छनोट ४ गरि १० टोलीबीच डबल राउन्ड रोबिन लिगको आधारमा राष्ट्रिय लिग गरिने एन्फाले आज जारी गरेको विज्ञप्तिमा उल्लेख छ।

राष्ट्रिय लिगको विजेताले एएफसी च्यालेन्ज लिग खेल्न पाउने पनि एन्फाले जनाएको छ। राष्ट्रिय लिगको लागि मंसिर ५ गते टिम दर्ता र मंसिर ९ गते खेलाडी दर्ता गर्नुपर्ने भनिएको छ। यस्तै खेल तालिका मंसिर १९ गते सार्वजनिक गरिनेछ।

राष्ट्रिय लिगलाई प्राथमिकतामा राख्दै एन्फा र क्लबहरुबीच सहिद स्मारक ‘ए’ डिभिजन लिग भने २०८३ सालको पुस ३ गते हुने सहमति भएको छ।

यो लिग होम एण्ड अवेको आधारमा हुने भनिएको छ। १४ ए डिभिजन क्लबले खेल्ने यो लिगको लागि होम ग्राउन्ड यसै वर्षको माघ देखि चैतसम्म छनोट गरी कागजी प्रक्रिया पूरा गर्ने बताइएको छ।

टिम दर्ता २०८३ साउन ३ गते र साउन ५ गते होम खेल ग्राउन्ड निरीक्षण गर्ने विज्ञप्तिमा भनिएको छ। ए डिभिजन लिगजो प्रि-सिजन खेलहरू मंसिर ३ देखि पुस २ गते भित्र तथा खेल तालिका मंसिर ३ गते सार्वजनिक गर्ने सहमति पनि भएको छ। यसैगरी लिगको लागि विभिन्न प्राविधिक बैठकहरूको मिति पनि तोकिएको छ।

आजको बैठकमा एन्फाका महासचिव किरण राई सिइओ इन्द्रमान तुलाधर तथा १४ टोलीका प्रतिनिधिले राष्ट्रिय लिग र ए डिभिजन लिगको लागि सहमति गर्दै संयुक्त विज्ञप्ति जारी गरेका हुन्। ए डिभिजन लिग पछिल्लो पटक सम्पन्न भएको आज ८ सय ७६ दिन पूरा भएको छ।

ए डिभिजन लिगको विषयमा नवनियुक्त युवा तथा खेलकुद मन्त्री बब्लु गुप्ताले चासो देखाउँदै मन्त्रालयमा नै बैठक गरेर लिग सञ्चालनको लागि ७ सदस्यीय कार्यदल समेत गठन गरेका थिए।