पोखरा (हाम्रो खेलकुद)- नेपाल प्रिमियर लिग (एनपिएल) टोली पोखरा एभेन्जर्ससँगको सहकार्यमा नेपथ्यले पोखरा रंगशालामा शुक्रवार पोखरामा रंगशालामा सांगीतिक प्रस्तुति दिने भएको छ ।

गण्डकी प्रदेशमा एनपिएलको ट्रफी टुरका दौरान नेपथ्यले सांगीतिक प्रस्तुति दिने पोखरा एभेन्जर्सले जानकारी गराएको छ।

नेपथ्यको सांगितिक प्रस्तुतिका बारेमा सामाजिक सञ्जाल मार्फत जानकारी दिएको केही घण्टामा पहिलो हजार टिकट र विद्यार्थी सहुलियत टिकट विक्री भइसकेको भन्दै एभेन्जर्सले समर्थकहरूलाई धन्यवाद दिएको छ ।

नेपथ्यसँगको सहकार्यले पोखरा एभेन्जर्सको लोकप्रिय थप उचाइमा पुर्‍याउने विश्वास लिएको जनाउँदै टोली अफिसियल किरण शमशेर राणाले अहिलेको समयमा देशमा एकता र भाइचाराको खाँचो रहेको बताए।

खेल र संगितलाई सम्बन्ध सेतुको रुपमा अगाडि बढाउने विश्वास पोखरा एभेन्जर्स म्यानेजमेन्टका मालिक सुवोध त्रिपाठीले बताए ।

नेपथ्यका गायक अमृत गुरुङले भने, ‘३ वर्षपछि गृह नगरमा प्रस्तुति दिन उत्साहित छौं । यसपटक क्रिकेटसँगको सहकार्यले थप रोमान्चकता थप्दै संगीत र क्रिकेटको सम्मिश्रणबाट आउने माधुर्यताले पोखरेली समर्थकलाई संगीतको तालमा नचाउन छौं।’

नेपथ्यको सांगितिक प्रस्तुति हेर्नका लागि पोखरा एभेन्जर्सको जर्सी किन्नुपर्ने पोखरा एभेन्जर्सले बताएको छ।

जर्सी विक्रीबाट आउने केही रकम पोखरा र आसपासका सामुदायिक विद्यालयहरूमा सामजिक उत्तरदायित्व अन्तर्गत क्रिकेट खेल विकासका लागि  प्रयोग गरिने  आयोजकले जानकारी दिएको छ।