दिपक बोहोरा, झापा

नेपालमा पछिल्लो समयमा महिला फुटबल लोकप्रिय छ। राष्ट्रिय खेलाडीसहितको प्रतिस्पर्धा खेल हर्ने दर्शकको बाक्लो उपस्थिति रहने गरेको छ।

अहिले झापाको शिवसताक्षीस्थित दुधे रंगशालामा जारी एलभिडी झापा महिला गोल्डकप फुटबल प्रतियोगितामा पनि दर्शकको उपस्थिति उल्लेख्य रहँदै आएको छ।

क्वार्टरफाइनल ४ खेल सकिँदा टिकट बिक्रीबाट ११ लाख ४४ हजार रुपैयाँ बराबरको आम्दानी भएको आयोजकले जनाएको छ।

खेल हेर्न स्थानीयदेखि आसपासका जिल्लाबाट दर्शकको उपस्थिति रहने गरेको छ। महिला फुटबलप्रति बढ्दो चासो, स्थानीय खेलाडीको सहभागिता र विभागीय टोलीको प्रतिस्पर्धाले दर्शकको आकर्षण झनै बढेको विश्वास गरिएको छ।

आयोजक झापा महिला फुटबल प्रतियोगिता समितिका अध्यक्ष सन्तोष थोप्राले भने, ‘दर्शकको उत्साहले हामीलाई थप जिम्मेवारी बढाएको छ। महिला फुटबललाई अझै मजबुत बनाउने हाम्रो लक्ष्य हो। टिकट बिक्रीबाट प्राप्त रकम प्रतियोगिता सञ्चालन, खेलाडी प्रोत्साहन र मैदान व्यवस्थापनमा प्रयोग गरिनेछ।’

क्वाटरफाइनलको सुरुवाती ३ खेलको टिकटबाट ९ लाख ७० हजार रुपैयाँ र बिहीवारको अन्तिम क्वाटरफाइनलको टिकटबाट १ लाख ७४ हजार रुपैयाँ सङ्कलन बताइएको छ।

विभागीय टोलीले खेल्दा दर्शक संख्या उच्च रह्यो। नेपाल पुलिस क्लब, एपिएफ फुटबल क्लब र त्रिभुवन आर्मी फुटबल क्लबसहित प्रतियोगितामा ८ टोलीको सहभागिता थियो।

३ विभागीयसहित संकटा क्लब झापा महिला गोल्डकपको सेमिफाइनलमा पुगेका छन्। साधारणतर्फ १ सय र २ सय तथा भिआइपीतर्फ १ हजार रुपैयाँ टिकट दर तोकिएको छ।