दिपक बोहोरा/हिमाल खरेल, झापा

एलभिडी झापा महिला गोल्डकप फुटबल प्रतियोगिताको पहिलो सेमिफाइनल खेल आज हुँदैछ।

झापाको शिवसताक्षीस्थित दुधे रंगशालामा दिउँसो ३ बजेबाट सुरु हुने खेलमा विभागीय टोली नेपाल पुलिस क्लब र संकटा एफसीबीच प्रतिस्पर्धा हुनेछ।

पुलिसले चर्च ब्वाइज युनाइटेडलाई ८–० ले र संकटा एफसीले घरेलु झापा एफसीलाई ६-० ले हराउँदै एकअर्कासँगको भेट पक्का गरेका थिए।

संकटामा पूर्णिमा राई सहित केहि यु २० खेलाडी र भुटानकी एक राष्ट्रिय खेलाडी छन्। पुलिस दाबेदार मध्येको एक हो। राष्ट्रिय खेलाडी रेखा पौडेल, उषा नाथ, मीना देउवा र पूजा राना लगायतका अनुभवी खेलाडी टोलीमा छन्।

आजको विजेताले फाइनलमा अन्य दुई विभागीय टोली एपिएफ र त्रिभुवन आर्मी क्लबमध्ये एकसँग फाइनल खेल्नेछ।

दर्शकका लागि टिकट दर आज सामान्यतर्फ २ सय र ३ सय रुपैयाँ तथा भिआइपीतर्फ १ हजार रुपैयाँ तोकिएको आयोजकले जनाएको छ।

प्रतियोगिताको फाइनल खेल कात्तिक २४ गते हुनेछ। विजेता टोलीले १० लाख १० हजार र दोस्रो टोलीले ५ लाख रुपैयाँ प्राप्त गर्नेछ।

सर्वोत्कृष्ट खेलाडीले १ लाख ५० हजार , उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडी, उत्कृष्ट प्रशिक्षक र उच्च गोलकर्ताले जनही २५ हजार रुपैयाँ पुरस्कार पाउने छन्।