दिपक बोहोरा/हिमाल खरेल, बिर्तामोड

नेपाल पुलिस क्लबकी‌ मिना देउवा एलभिडी झापा महिला गोल्डकप फुटबल प्रतियोगिताको सर्वोत्कृष्ट खेलाडी चुनिएकी छिन्।

मिनाकै एक मात्र गोलमा घरेलु महिला फुटबलको सर्वाधिक सफल टोली एपिएफ फुटबल क्लबलाई १-० ले हराउँदै पुलिस च्याम्पियन बनेको थियो। उनले २२ औं मिनेटमा गरेको गोल खेलको निर्णायक बनेको थियो।

मिनाले सर्वोत्कृष्ट खेलाडी वापत १ लाख ५० हजार रुपैयाँसहित ट्रफी प्राप्त गरिन् । उनी प्रतियोगिताको सर्वाधिक गोलकर्ता समेत बनिन् । फाइनलमासहित ३ खेलमा मिनाले ७ गोल गरेकी थिइन्।

मिनाले कात्तिक १० गते इरानविरुद्ध खेल्दै राष्ट्रिय महिला फुटबल टोलीबाट डेब्यु गरेकी थिइन्। पुलिसकै पूजा राना प्लेयर अफ दि म्याच घोषित भइन्।

त्यस्तै पुलिसकी उषा नाथ उत्कृष्ट गोलकिपर, एपिएफकी मनमाया दमाई उत्कृष्ट डिफेन्डर , एपिएफकी रेनुका नगरकोटी उत्कृष्ट मिडफिल्डर, एपिएफकी उत्कृष्ट फरवार्ड अनिता बस्नेत (एपिएफ) उत्कृष्ट फरवार्ड, पुलिसका भोला सिलवाल उत्कृष्ट प्रशिक्षक चुनिए।

त्रिभुवन आर्मी फुटबल क्लबकी जेनिफर राना मगर उदियमान खेलाडी घोषित भइन् । उत्कृष्टले समान २५ हजार रुपैयाँ प्राप्त गरे।

विजेता पुलिसले उपाधिसहित १० लाख १० हजार र एपिएफले ५ लाख रुपैयाँ प्राप्त गर्यो । कात्तिक १७ गते सुरु भएको प्रतियोगितामा ८ टोलीको सहभागिता थियो।

यसैबीच, एपिएफविरुद्धको फाइनलमा ६३ औं मिनेटमा घाइते भएकी नेपाल पुलिस क्लबकी फरवार्ड रेखा पौडेलको बिर्तामोडस्थित स्पाइन एक्स सुपरस्पेसालिटी अस्पताल तथा ट्रमा सेन्टरमा उपचार भइरहेको छ। उनको दायाँ काधँमा चोट लागेकोले बिर्तासिटी अस्पतालमा एमआरआईमा भएको थियो।