रविन्द्र वाईबा, हेटौंडा

कास्कीको लालीगुराँस एसोसिएसन र काठमाडौंको चित्लाङ एफसी राष्ट्रिय लिगको लागि छनोट भएको छन्। हेटौंडामा जारी एन्फा प्रेसिडेन्ट लिगमा समूह `ए´ बाट दुबै टोली अन्तिम चारमा पुगेको हो।

लालीगुराँस समूह विजेता र चित्लाङ उपविजेता बन्दै लिगको अन्तिम चारमा प्रवेश गरेको हो। लिगमा ४ खेल खेलेको लालीगुराँसले २ खेलमा जित र २ खेल बराबरी खेल्दै ८ अंक बटुल्यो। समान ४ खेल खेलेको चित्लाङ भने २ खेलमा जित, १ बराबरी र १ खेलमा हार बेहोर्दै ७ अंक जोडेर उपविजेता बनेको हो।

समूह चरणको अन्तिम खेलमा चित्लाङले बर्दियाको जनजागृतीलाई २-० हरायो। चित्लाङका लागि विज्ञान खड्काले १३ औं र मदन स्याङ्तनले ७० औं मिनेटमा गोल गरे। चित्लाङका जय गुरुङ प्लेयर अफ दि म्याच घोषित भए।

आज दोस्रो खेलमा लालीगुराँसले धनकुटाको देउराली युथ क्लबसँग गोलरहित बराबरी खेल्दै खेलेको थियो। समुह `ए´ बाट कैलालीको विजय स्पोर्ट्सले ६ अंक, देउरालीले ३ अंक र बर्दियाको जनजागृतीले एक अंक मात्र जोड्यो ।

समूह `बी´ को अन्तिम २ खेल बाँकी रहँदा बाराको नव जागृती र सुर्खेतको कार्के विहार समान ७ अंकका साथ शिर्ष स्थानमा छ।

यस्तै तनहुँको हैरान्स क्लबको ४ अंक, दोलखाको टाइगर्स टिमको ३ अंक र उदयपुरको गाईघाट फुटबल क्लबको १ अंङ्क छ। समूह चरणको अन्तिम खेलमा भोलि नव जागृती र हैरान्स क्लब तथा गाईघाट र कार्केविहार भिड्नेछन् ।

समूह विजेता र उपविजेता लिगको सेमिफाइनलमा प्रवेश गर्नुका साथै राष्ट्रिय लिगमा छनोट हुनेछन् । सेमिफाइनल कात्तिक ३० गते र फाइनल मंसिर २ गते हुनेछ ।प्रतियोगिताको विजेता टोली १० लाख र दोस्रो टोलीले ५ लाख रुपैयाँ प्राप्त गर्नेछ।