बिर्तामोड (हाम्रो खेलकुद)– रमपम झापा गोल्डकप मुल आयोजक समितिले क्लबका कप्तान झापा ११ का कप्तान प्रवेश कटुवालाई लाइभ टाइम अचिभमेन्ट अवार्डबाट सम्मानित गरेको छ । झापा गोल्डकपको आयव्यय सार्वजनिक गर्ने क्रममा मंगलबार प्रवेशलाई सम्मानसहित मोटरसाइकल प्रदान गरिएको थियो ।

३८ बर्षे प्रवेशको कप्तानमा झापाले दर्जनौं उपाधि जितेको छ । यो बर्ष टोलीले काँकरभिट्टा गोल्ड कपको उपाधि जितेको थियो । झापा गोल्डकपमा भने टोलीले दोस्रो स्थानमा चित्त बुझाउनु परेको थियो । सम्मानपछि प्रवेशले भने, ‘गोल्डकपको पहिलो संस्करणबाटै यो अवार्ड राखिएको भए अझ राम्रो हुने थियो।’

सोही अवसरमा टोलीका अन्य खेलाडीलाई भने बोनस रकम वितरण गरिएको छ । प्रत्येक खेलाडीले बोनस वापत २५ हजार रुपैयाँ प्राप्त गरे । आफैले आयोजना गरेको रमपम झापा गोल्डकप जितेको भए प्रत्येक खेलाडीलाई ५१ हजार र दोस्रो हुँदा २५ हजार रुपैयाँ बोनस दिने मुल आयोजक समितिले प्रतियोगिता अघि नै घोषणा गरेको थियो ।

झापा गोल्डकपको नाफा ५६ लाख बढी
मोफसलकै सर्वाधिक पुरस्कार राशिको झापा गोल्डकपबाट ५६ लाख रुपैयाँ भन्दा बढी नाफा भएको छ । झापाको जामुनखाडीमा आयोजित कार्यक्रममा मुल आयोजक समितिका कोषाध्यक्ष केदार गिरीले गोल्डकपबाट ५६ लाख २१ हजार ५ सय ३२ रुपैयाँ नाफा भएको सार्वजनिक गरेका थिए । गोल्डकपमा १ करोड ४४ लाख ९३ हजार २ सय ५६ रुपैयाँ आम्दानी तथा ८८ लाख ७१ हजार ७ सय २४ रुपैयाँ खर्च भएको जानकारी गराइएको थियो ।

गोल्डकप माघ १५ देखि २४ गतेसम्म बिर्तामोडको डोमालाल राजवंशी रङ्गशालामा सञ्चालन भएको थियो । ७ लाख पुरस्कार राशिको प्रतियोगिताको उपाधि लक्ष्मी हुन्डाई मनाङ मस्र्याङ्दीले जित्दा आयोजक टोली झापा–११ दोस्रो भएको थियो । मनाङको बर्षको त्यो तेस्रो उपाधि जिते । झापाले दोस्रो भएवापत ३ लाख ५० हजारमा चित्त बुझाएको थियो । आयोजक समितिले झापा गोल्डकपको सम्पूर्ण विवरण समेट्दै स्मारिकासमेत प्रकाशन गरेको छ ।

झापा–११ का अध्यक्ष जलकुमार गुरुङले झापा–११ चर्चाको शिखरमा पुगेको बताए । झापा जिल्ला फुटबल संघका समेत अध्यक्ष रहेको गुरुङले झापा ११ ले आउने दिनमा विदेशी क्लबहरुसँग पनि फुटबल खेल्ने गुरुङले जानकारी गराए ।

मुल आयोजक समितिका अध्यक्ष महेन्द्रकुमार गिरीले क्लबलाई विधिवत दर्ता गरी गोल्डकपलाई निरन्तरता दिने प्रतिवद्धता जनाए । कार्यक्रममा झापाका प्रमुख जिल्ला अधिकारी उत्तरकुमार खत्री, सांसद् सुधीरकुमार शिवाकोटी, काङ्ग्रेस झापाका निवर्तमान उपसभापति देउमान थेवे, एमाले झापाका अध्यक्ष चिन्तन पाठक लगायतले गोल्डकपको महत्वको बारेमा चर्चा गरेका थिए ।