दिपक बोहोरा
पाँचथर – आन्तरिक र बाह्य पर्यटनको विकास गर्ने उद्देश्यका साथ पाँचथरको फिदिममा अर्को महिना प्रथम पाँचथर गोल्डकप फुटबल प्रतियोगिता आयोजना हुने भएको छ । पाँचथर क्लबले आइतबार पत्रकार सम्मेलन गर्दै नयाँ वर्षको अवसर पारेर बैशाख २ गते देखि ९ गते सम्म फिदिम उच्च माविको मैदानमा गोल्ड कप सञ्चालन गरिने जानकारी दिएको छ ।
पाँचथर क्लबले पहिलो पटक आयोजना गर्ने लागेको गोल्डकपमा विर्ता युनाइटेड झापा, एपिएफ पुर्वाञ्चल, पथरी स्पोर्टिङ क्लब, मिसन युनाइटेड ताप्लेजुङ, डिएफसि मोरङ, कञ्चनजङघा फुटबल क्लब, सिलगुढी, इलाम ११र आयोजक पाँचथर क्लबको सहभागिता रहने आयोजक क्लबका अध्यक्ष अनुराग मगरले बताए ।
झन्डै १८ लाख रुपैयाँ खर्च हुने प्रतियोगिताको विजेताले उपाधिसहित १ लाख ५० हजार र दोस्रो हुने टोलीले १ लाख रुपैयाँ प्राप्त गर्नेछ । पाँचथरको फिदिममा यस अघि पुस १५ गते देखि २४ गते सम्म आठौं फाल्गुनन्द गोल्ड कप आयोजित फुटबल प्रतियोगिताको उपाधि विर्ता युनाइटेड झापाले जितेको थियो ।
