उदयपुर (हाम्रो खेलकुद)– विगतमा घाटा हुँदै आएको रमपम उदयपुर गोल्डकप फुटबल प्रतियोगिता चौथो संस्करणको समाप्तीमा आइपुग्दा नाफामा गएको छ । माघ २५ देखि फागुन ५ गते सम्म आयोजना भएको प्रतियोगिताबाट २ लाख ७६ हजार ५ सय ११ रुपैयाँ नाफा भएको आयोजक उदयपुर गोल्ड कप मुल आयोजक समितिले आइतबार पत्रकार सम्मेलनमार्फत जानकारी दिएको छ ।
नेपाल पत्रकार महासंघ उदयपुरमा आयोजित पत्रकार सम्मेलन गर्दै आयोजक समितिका अध्यक्ष एवंम् अखिल नेपाल फुटबल संघ (एन्फा) का सहायक महासचिव किरण राईले प्रतियोगितामा सहयोग पुर्याउने सबैलाई धन्यावदन दिए ।
यसपटक प्रतियोगितामा ३४ लाख ४४ हजार ५ सय रुपैयाँ आम्दानी र ३१ लाख ७० हजार ९ सय ८९ रुपैयाँ खर्च भएको बताइएको छ । यसपटक ४ लाख रुपैयाँ भन्दा बढी रकम उठ्न बाँकी रहेको आयोजक समितिका कोषाध्यक्ष प्रदिप श्रेष्ठले जानकारी दिए ।
एसियन थाइ फुड्सले प्रायोजन गरेको गोल्डकपमा त्रियुगा नगरपालिका, जिल्ला विकास समिति, अन्य कम्पनी र स्थानियहरुको सहयोग रहेको बताइएको छ । अग्नी रुपन्देहीले यसपटकको उदयपुर गोल्डकप जितेको थियो ।
