काँकरभिट्टा (हाम्रो खेलकुद)– नेपाल खेलकुद पत्रकार मञ्च झापा समन्वय शाखाका अध्यक्ष रमेश समदर्शी र उपाध्यक्ष कृष्ण सिञ्जाली सोमबार सम्मानित भएका छन् । काँकरभिटटा फुटबल टे«निङ सेन्टरले मेची नेत्रालय काँकरभिट्टा गोल्ड कप प्रतियोगिता २०७३ दोस्रो संस्करणको आय ब्यय सार्वजनिक गर्ने कार्यक्रममा उनीहरुलाई सम्मान गरिएको थियो ।

सेन्टरका अध्यक्ष मीनबहादुर बस्नेत, काँकरभिट्टा भेट्रान फुटबल क्लबका अध्यक्ष गङ्गालाल गुरुङ, प्रतियोगिता सहयोग समितिका सदस्य राजु कार्की, मेची फुटबल क्लबका कोषाध्यक्ष कर्णबहादुर थापा, एन्फा प्रशिक्षक दीपक कार्कीलगायतले समदर्शी र सिञ्जालीलाई संयुक्त रुपमा सम्मान पत्र र समान ५ हजार ५ सय रुपैयाँसहित सम्मान गरेको थियो ।

समदर्शी विवेचना दैनिकका समाचार सम्पादक, नेपाल समाचार पत्रका झापा संवाददाता र गोल नेपाल डट कममा आवद्ध छन् । सिञ्जाली स्वतन्त्र फोटो पत्रकार र गोल नेपाल डट कमका झापा सम्वाददाता हुन् । यसै क्रममा झापाका फुटबल खेलाडी नगेन्द्र लिम्बुलाई सेन्टरले मायाको चिनो प्रदान गरेको थियो । काँकरभिट्टा गोल्डकपमा ७ लाख रुपैयाँ बढी बचत भएको आयोजकले जानकारी दिएका थिए ।