लण्डन (एजेन्सी)– म्यानचेस्टर युनाइटेडका महान प्रशिक्षक सर एलेक्स फर्गुसनले फेरी एकपटक टोली सम्हाल्ने भएका छन्. । जून ४ मा माइकल क्यारिकको बिदाईमा हुने खेलमा फर्गुसनले टोलीको प्रशिक्षकको भूमिका निर्वाह गर्नेछन् । खेल माइकल क्यारिक अल स्टार्स र युनाइटेडकाबीचमा हुनेछ । क्यारिक अल स्टार्स टोलीको प्रशिक्षणको जिम्मेवारी ह्यारी रेडन्यापले गर्नेछन् ।
युनाइटेडलाई ३८ उपाधि दिलाएका फर्गुसनले टोटनह्याम हट्स्पर्सबाट क्यारिकलाई सन् २००६ मा क्लबमा भित्राएका थिए । क्यारिकले वेस्ट ह्यामबाट ‘डेब्यू’ गर्दा त्यति बेला टोली प्रशिक्षक रहेका रेडन्यापले यसपटक क्यारिकको टोली हेर्न सहजै स्वकारेका थिए । झन्डै १० बर्ष युनाईटेडबाट व्यावसायिक खेल जीवन अघि बढाएका क्यारिकलाई क्लबले नयाँ सम्झौता नदिएपछि उनले संन्यासको घोषणा गरिसकेका छन् । सम्झौताको अन्तिम बर्षमा रहेका क्यारिकलाई अहिलेसम्म क्लबले नयाँ सम्झौताको लागि कुनै प्रक्रिया आगाडि बढाएको छैन ।
क्यारिकको टोलीबाट रायन गिग्स, पल स्कोल्स, फ्रान्क लाम्पार्ड र स्टेभन जेर्रार्ड खेल्ने पक्का भइसकेकोछ । २००९मा युनाइटेडबाट रियल म्याड्रिड पुगेका क्रिस्टियानो रोनाल्डो खेल्ने नखेल्ने भने निश्चित भइसकेको छैन ।
