प्रकाश तिमल्सिना
काठमाडौं – झन्डै अढाई महिनापछि राष्ट्रिय टोलीका गोलकिपर किरण चेम्जोङ मंगलबार स्वदेश आइ पुग्ने भएका छन् । टिसी स्पोर्टसमा आबद्ध भएपछि पुसको २६ मा माल्दिभ्स गएका किरण त्यसयता पहिलो पटक स्वदेश फर्कन लागेका हुन् । एसियन कप छनोटअन्तर्गत फिलिपिन्सविरुद्ध चैत १५ मा हुने पहिलो खेलका लागि उनी राजधानी आउन लागेका हुन् । माल्दिभ्सको समय अनुसार राती ८ः२० मा विमान चढ्न लागेका किरण कतार हुँदै भोली बिहान त्रिभुवन विमानस्थल ओलर्नेछन् ।
माले विमास्थलमा किरण चेम्जोङलाई विदाई गर्न पुगेका टिसी स्पोर्टस् रक्षक इजिप्टका अलादिन (दायाँ) ।
अढाई महिनाको बीचमा उनको टोलीले बंगलादेशमा आयोजना भएको शेख कमल अन्तर्राष्ट्रिय क्लब कप फुटबल प्रतियोगिताको उपाधि जितेको थियो । टिसी स्पोर्टसले सेमिफाइनलमा लक्ष्मी हुन्डाई मनाङ मस्र्याङ्दीलाई पराजित गरेको थियो । पूर्व क्लब मनाङविरुद्ध किरणले म्यान अफ दी म्याच प्रदर्शन गरेका थिए ।
माल्दिभ्स फर्केर उनको टोलीले लिगको पहिलो खेलमा जित हासिल गरेको थियो । आइतबारका लागि तय भएको लिगको अर्को खेल भने फ्लुका कारण स्थगित भएको किरणले जानकारी दिए । किरणले पछिल्लो दुई महिना व्यक्तिगत करियरका लागि सुखद रहेको र अब राष्ट्रका लागि फेरी एकपटक उच्च प्रदर्शन गर्ने बेला आएको बताए ।
‘ फिलिपिन्ससँगको खेललाई लिएर उत्साहित छु । हामीले लगातार नेपाली फुटबलमा इतिहास बनाइरहेको छौं । फेरी एकपटक नयाँ इतिहास रच्ने मौका पाएका छौं,’ माले विमानस्थलबाट किरणले टेलिफोनमा हाम्रो खेलकुदसँग भने,‘ व्यक्तिगत रुपमा मेरो पनि यो सिजन राम्रो भएको छ । हाम्रो भन्दा स्तरीय लिग खेल्ने अवसर पाएको छु । पक्कै पनि यहाँको अनुभवले राष्ट्रिय टोलीमा फाइदा पुग्ने विश्वास लिएको छु ।’
कात्तिक अन्तिममा मलेसियामा सम्पन्न एएफसी सोलिडारिटी कप जितेपछि र ग्वामले खेल्न नपाउने भएपछि नेपालले पुनः एसियन कप छनोट खेल्ने मौका पाएको थियो । नेपाली टोलीले उच्च प्रदर्शन गर्दै सोलिडारिटी कप जितेको थियो । त्यसको सेमिफाइनलमा किरणले दुईवटा पेनाल्टी रोकेका थिए । सोलिडारिटी कप नै नेपालले जितेको एसियाली फुटबल महासंघ (एएफसी) को पहिलो आधिकारिक प्रतियोगिता हो । एसियान कप छनोटको समूह ‘एफ) मा नेपाल र फिलिपिन्ससँगै यमन र ताजकिस्तान रहेका छन् ।
