काठमाडौं (हाम्रो खेलकुद) – नेपाली राष्ट्रिय फुटबल टोलीका गोलरक्षक किरण चेम्जोङ आज स्वदेश आइपुगेका छन् । टिसी स्पोर्टसमा आबद्ध भएपछि पुसको २६मा माल्दिभ्स पुगेका किरण त्यसयता पहिलो पटक स्वदेश फर्केका हुन् । एसियन कप छनोटअन्तर्गत फिलिपिन्सविरुद्ध चैत १५ मा हुने पहिलो खेलका लागि उनी नेपाल आएका हुन्।
निवास पुगेपछि आमा संग किरण; उनि हाल नख्खुमा बस्दै आएका छन्
किरणले राष्ट्रिय टोलीसंग रहेर बुधबारबाटै प्रशिक्षण थाल्नेछन। सातदोबाटो स्थित अखिल नेपाल फुटबल संघको मैदानमा विगत ५ सातायता राष्ट्रिय टोलि प्रशिक्षणरत छ। मुख्य प्रशिक्षक ग्योतोकु कोजीले प्रारम्भिक छनोटमा बोलाएका ३६ खेलाडीबाट २ चरणको छनोट पछि हाल २० खेलाडी सम्मिलित अन्तिम टोली प्रशिक्षणमा व्यस्त छ। गोलरक्षकमा किरण संगै विकेश कुथु र विशाल श्रेष्ठ रहेका छन्। गोलरक्षक प्रशिक्षकको जिम्मेवारी उज्ज्वल मानन्धरले गरिरहेका छन्।
कात्तिक अन्तिममा मलेसियामा सम्पन्न एएफसी सोलिडारिटी कप जितेपछि र ग्वामले खेल्न नपाउने भएपछि नेपालले पुनः एसियन कप छनोट खेल्ने मौका पाएको थियो । नेपाली टोलीले उच्च प्रदर्शन गर्दै सोलिडारिटी कप जितेको थियो । त्यसको सेमिफाइनलमा किरणले दुईवटा पेनाल्टी रोकेका थिए । सोलिडारिटी कप नै नेपालले जितेको एसियाली फुटबल महासंघ (एएफसी) को पहिलो आधिकारिक प्रतियोगिता हो । एसियान कप छनोटको समूह ‘एफ) मा नेपाल र फिलिपिन्ससँगै यमन र ताजकिस्तान रहेका छन् ।
