दिपक न्यौपाने
बुटवल – युनाइटेड कपिलबस्तु प्रथम सैनामैना गोल्ड कप फुटबल प्रतियोगिताको सेमिफाइनलमा पुगेको छ । सुनौलो शान्ति युवा क्लब गजेडीलाइ सडन डेथमा १–१ (६—५) ले पराजित गर्दै अन्तिम चार प्रवेश गरेको हो ।
निर्धारित ९० मिनेटको खेल १–१ को बराबरीमा टुंगिएको थियो । पहिलो हाफको ४४ औ मिनेटमा युनाइटेडका बिक्रम थापाले गोल गरेका थिए भने ४९ औं मिनेटमा सुनौलो शान्तिको तर्फबाट रुपेन पुनले बराबरी गोल गरेका थिए । युनाइटेडका गोलरक्षक सिमोस थापा म्यान अफ दि म्याच घोषित भए ।
जनप्रिय स्पोर्टस क्लब देवापारको आयोजनामा रुपन्देहीको सैनामैना वडा नं ७ मा सञ्चालित प्रतियोगितामा बिहीबार सालझण्डी युवा सन्जाल र सुनौलो संगम युवा क्लब देबिनगरबीच अन्तिम क्वार्टरफाइनल खेल हुने आयोजक क्लबका उपाध्यक्ष दिपक काउचाले हाम्रो खेलकुद डटकमलाइ जानकारी दिए ।
यसअघि फर्साटिकर क्लब फर्साटिकर र देशभक्त भैरव एफ.सी नवलपरासी सेमिफाइनलमा प्रवेश गरेका थिए । सैनामैना नगरपालीकाको संरक्षणमा सन्चालित प्रतियोगिताको विजेताले १ लाख १७ हजार तथा दोस्रो हुने टोलीले ५८ हजार रुपैयाँ प्राप्त गर्नेछन् । सेमिफाइनलमा पराजित हुने दुई टोलीले समान १२ हजार रुपैयाँ प्राप्त गर्नेछन् ।
