काठमाडौं (हाम्रो खेलकुद)– नेपाली राष्ट्रिय फुटबल टोली एएफसी एसियन कप छनोट चरणअन्तर्गत फिलिपिन्सविरुद्धको अवे खेलका शनिबार त्यसतर्फ प्रस्थान गर्ने भएको छ । नेपाल र फिलिपिन्सबीच चैत १५ गते रिजाल रंगशालामा पहिलो खेल हुँदैछ ।
नेपालले आन्तरिक तयारीमा जोड दिइरहँदा फिलिपिन्सले भने मंगलबार मैत्रीपूर्ण खेलमा मलेसियासँग गोलरहित बराबरी खेलेको थियो । नेपाल र फिलिपिन्स खेल हुने मैदानमै मंगलबारको मैत्रीपूर्ण खेल भएको थियो । अखिल नेपाल फुटबल संघ (एन्फा) ले टोलीको विदाई भने शुक्रबार नै राखेको छ ।
बिहीबार बिहानको अभ्यास सत्रपछि राष्ट्रिय टोलीका खेलाडीलाई भेट्दै एन्फा अध्यक्षले सफलताको शुभकामना दिएका थिए । ‘हामी अहिले सहि बाटोमा छौं । सौभाग्यले खेल्न पाएका छौं । पाएको मौकालाई उपयोग गर्नुपर्छ,’ उनले भने, ‘आत्मविश्वासका साथ खेल्नुहोस् । यो पछि पनि पाँच खेल खेल्न बाँकी हुन्छ । त्यसमध्ये तीन खेल होम म्याच छ । त्यसैले वरियतामा फिलिपिन्स माथि भएपनि सकारात्मक साथका साथ उत्रनुपर्छ । फेरी हामीले आफुलाई एकपटक प्रमाणित गर्नुपर्ने हुन्छ । ’
एन्फाका प्रमुख कार्यकारी अधिकृत इन्द्रमान तुलाधरले जित्ने मनोबलका साथ फिलिपिन्सविरुद्ध उत्रन सुझाए । ‘आफु भन्दा बलियोलाई हराएपछि मात्र स्तर माथि जान्छ’ उनले भने, ‘त्यसलै आत्तिन पर्ने केही छैन । फिलिपिन्स हामीले हराउन नसक्ने टोली होइन । ’ जापानी प्रशिक्षक ग्यातुको कोजीको प्रशिक्षणमा २० सदस्यीय नेपाली टोलीले एन्फा कम्प्लेक्सको मैदानमा तयारी गरिरहेको छ ।
