दिपक न्यौपाने
बुटबल – सुनौलो संगम युवा क्लब बुटवल सैनामैना गोल्डकप फुटबल प्रतियोगिताको सेमिफाइनलमा पुगेको छ । विश्वास श्रेष्ठको २ गोलको मद्दतमा सालझन्डी युवा सञ्जाललाई ४–० ले हराउँदै सुनौलो संगम अन्तिम चारमा पुगेको हो ।

तेस्रो मिनेटमा विश्वासको गोलबाट अग्रता लिएको सुनौलोका लागि दानु थापाले १६ औं र सुरज हमालले ३५ औं मिनेटमा गोल गरेपछि टोलीले पहिलो हाफमै ३–० को अग्रता लिएको थियो । ७६ औं मिनेटमा अर्को गोल थपेका विश्वास खेलको म्यान अफ दी म्याच घोषित भए ।

जनप्रिय स्पोर्टस क्लब देवापारको आयोजनामा रुपन्देहीको सैनामैना वडा नं ७ मा सञ्चालित प्रतियोगितामा शुक्रबार हुने पहिलो सेमिफाइनलमा देशभक्त भैरव एसफसी र युनाइटेड कपिलबस्तुबीच हुनेछ । देशभक्तले गोर्खा ब्वाइजलाई २–० ले र युनाइटेडले न्यु सृजना युवा क्लब गजेडीलाई सडन डेथमा हराउँदै भेट पक्का गरेका थिए ।

सैनामैना नगरपालीकाको संरक्षणमा सन्चालित प्रतियोगिताको विजेताले १ लाख १७ हजार तथा दोस्रो हुने टोलीले ५८ हजार रुपैयाँ प्राप्त गर्नेछन् । सेमिफाइनलमा पराजित हुने दुई टोलीले समान १२ हजार रुपैयाँ प्राप्त गर्नेछन् ।