मोन्टेभिडियो (एजेन्सी)– विश्व कप अन्तर्गत दक्षिण अमेरिकी छनोटमा चिलीले अर्जेन्टिनालाई रोक्न सकेन । महत्वपूर्ण मानिएको खेलमा शुक्रबार अर्जेन्टिनाले चिलीलाई १–० ले हराएको छ । कप्तान लियोन मस्सीले पेनाल्टी गोलमा दिलाएको अग्रता नै अर्जेन्टिनाको जितका लागि पर्याप्त रह्यो ।
मेस्सीले १६ औं मिनेटमा पेनाल्टी गोल गरेका थिए । चिलीका रक्षकले एन्जल डि मारियालाई पेनाल्टी बक्समा लडाएपछि अर्जेन्टिनाले पेनाल्टी पाएको थियो । जितपछि अर्जेन्टिना अंक तालिकाको तेस्रो स्थानमा उक्लेको छ । १० राष्ट्र रहेको छनोटमा शीर्षस्थानमा रहेको ब्राजिलको ३० अंक छ ।
दोस्रो स्थानको उरुग्वे २३ र अर्जेन्टिनाको २२ अंक छ । चौथो स्थानको कोलम्बियाको २१ अंक छ । यसअघिका चार खेलमा पुरु र भेनेजुएलासँग बराबरी तथा पाराग्वे र ब्राजिलसँग हार बेहोरेपछि अर्जेन्टिनाको सोझै विश्व कपमा छनोट हुने सम्भावना कमजोर भएको थियो ।
यद्दपी सान्टियागोमा गत मार्चमा भएको खेलमा पनि अर्जेन्टिनाले चिलीलाई २–१ ले हराएको थियो । शुक्रबारका अन्य छनोटमा अन्य खेलमा ब्राजिलले उरुग्वेलाई ४–१ ले हरायो भने भेनेजुएला र पेरुले २–२ को बराबरी खेलेका थिए ।
