दिपक बोहोरा
इलाम – घरेलु फुटबलमा यो सिजनको सर्वाधिक सफल टोली लक्ष्मी हुन्डाई मनाङ मस्र्याङ्दी क्लबले आज अर्को उपाधि यात्राको प्रारम्भ गर्दैछ । इलाममा जारी टुबोर्ग तेस्रो माईभ्याली गोल्ड कपको तेस्रो क्वार्टरफाइनलमा मनाङले आज ए डिभिजन प्रतिद्वन्द्वि नेपाल पुलिस क्लबको सामना गर्नेछ ।

केही बर्षअघि सम्म घरेलु फुटबलमा सबै खाले फुटबलको दाबेदार रहने गरेको पुलिस पछिल्लो समय भने कमजोर रहँदै आएको छ । टोलीले यो सिजनमा एउटा मात्र उपाधि जित्न सकेको छ । पुलिसले गत महिना धरानमा भएको १९ औं बुढासुब्बा गोल्ड कपको उपाधि जितेको थियो ।

अर्कोतर्फ मनाङले भने यो बर्ष सबैभन्दा बढी यो सिजन चार वटा उपाधि जितिसकेको छ । सुदूरपश्चिमाञ्चलमा माघको पहिलो साता सुदूरपश्चिम खप्तड गोल्ड जित्दै उपाधि यात्रा सुरु गरेको मनाङले त्यसपछि लगातार आहा रारा गोल्डकप र रमपम झापा गोल्डकपको उपाधि जितेको थियो ।

टोलीका नियमित ८ खेलाडी विना पनि टोली गत साता सर्लाहीमा राजर्षि जनक कप जितेको थियो । अहिले राष्ट्रिय टोलीको जिम्मेवारी पुरा गरेर ८ खेलाडी टोलीमा फर्किसकेका छन् । त्यसैले टोली गत साता भन्दा थप बलियो भएको छ । अर्को तिर पुलिस पुरानो छवि फर्काउने प्रयासमा हुनेछ । मनाङ माईभ्याली गोल्डकप जिते बर्षको पाँचौं उपाधि जित्ने तयारीमा हुनेछ ।

इलाम जिल्ला फुटबल संघ र माइभ्याली फुटबल क्लबलको संयुक्त आयोजनामा जारी प्रतियोगितामा त्रिभुवन आर्मी क्लब र झापा सेमिफाइन पुगिसकेका छन् । अर्को क्वार्टरफाइनलमा भोली सिएमजी क्लब संकटा र एपिएफबीच प्रतिस्पर्धा हुनेछ ।