चेल्सी (एजेन्सी)– इडेन हाजार्डले २ गोल गरेपछि गए राती म्यानचेस्टर सिटीमाथि २–१ को जित हासिल गर्दै शीर्षस्थानको चेल्सीले प्रिमियर लिगमा ७ अंकको अग्रतालाई कायम राखेको छ ।
हाजार्डले १० मिनेटमा पहिलो गोल गरेका थिए । तर, २६ औं मिनेटमा सर्जियो अगुइरोको गोलबाट सिटी खेलमा फर्केको थियो । चेल्सीले बराबरीलाई लामो समय रहन दिएन । हाजार्डले ३५ औं मिनेटमा दोस्रो गोल गरे । त्यहिनै खेलको निर्णायक बन्यो ।
पेनाल्टीमा आफ्नो प्रहारलाई विलि काबारेलो रोकेपछि त्यहि रिबाउन्डमा हाजार्डले गोल गरेका थिए । अघिल्लो खेलको कारण भएको दबाबलाई पनि चेल्सीले जितसँग कम गराएको छ ।
जितपछि चेल्सीको अंक ७२ पुगेको छ । दोस्रो स्थानको टोटेनह्यामको भन्दा चेल्सीको ७ अंक बढी छ । बुधबार राती नै टोटेनह्यामले स्वान्सी सिटीलाई ३–१ ले हरायो । अन्य खेलमा आर्सनलले वेस्ट ह्याम युनाइटेडलाई ३–०ले, हल सिटीले मिडल्सब्रोलाई ४–२ ले, साउथह्याम्प्टनले क्रिस्टल प्यालेसलाई ३–२ ले पराजित गर्यो भने लिभरपुल र बोर्नमाउथले २–२ को बराबरी खेले ।
तेस्रो स्थानको लिभरपुलको ६०, सिटीको ५८ तथा समान ५४ अंक भएको आर्सनल पाँचौं र म्यानचेस्टर युनाइटेड छैटौं स्थानमा छ ।
